Oblys ortalyǵynda ashylǵan týberkýlez aýrýynan emdeıtin aýrýhanany «100 mektep, 100 aýrýhana» baǵdarlamasyna oraı júzege asqan jumystardyń biri dep sanaýǵa bolady.
Osy aýrý túrimen syrqattanýshylar qataryn 2020 jylǵa deıin 20 paıyzǵa azaıtý máselesi bıylǵy Joldaýda da aıtyldy. Árıne, Joldaýdan týyndaǵan oılar zamanaýı úlgide salynǵan aýrýhanalar arqyly oryndalyp jatsa, aýrýlar sanynyń azaıatynyna da kúmán joq. Oblys ortalyǵyndaǵy bul aýrýhana 210 adamǵa arnalsa, emhanasy kúnine 100 adam qabyldaı alady. Jańa nysannyń qurylysyna respýblıkalyq bıýdjetten 2 mlrd. 100 mıllıon teńge bólindi. Bul kúnderi aýrýhana jarqyraǵan jańa kelbetke enip, aýrý jandar densaýlyǵyn emdeýge kóshken. Aýrýhana quramyndaǵy tórt terapevtik bólimshede 67 dáriger, 176 orta deńgeıdegi medısınalyq qyzmetker eńbek etýde. Sonymen qatar, medısınalyq qaldyqtardy joıýǵa arnalǵan seh ashyldy. Bul basqa emdeý oryndaryna da múmkindik týdyrdy. Aýrýhana sehtyń arqasynda jylyna 2 mıllıon teńge únemdeı alady. Sý tazartatyn shaǵyn qurylǵylary da bar. Aýlasy qorshalyp, ortalyqtandyrylǵan beınekameralar ornatylǵan.
Farıda BYQAI.
Pavlodar.