Elordanyń jańa temirjol vokzaly 2017 jyldyń mamyr aıynda paıdalanýǵa beriledi. Bul týraly búgin QR Premer-Mınıstriniń birinshi orynbasary Asqar Mamınniń tóraǵalyǵymen Astana qalasynyń jańa temirjol vokzalynyń qurylysy jáne Astana stansııasynyń temirjol torabyn damytý máseleleri boıynsha ótken kóshpeli keńeste belgili boldy, dep habarlaıdy primeminister.kz.
Atalǵan jobalardy iske asyrý barysy jaıly «Qazaqstan temir joly» UK» AQ basshysy Q. Alpysbaev baıandady. Ol qazirgi tańda Astananyń vokzal kesheniniń jáne temirjol torabynyń ázirligi 80% quraıtynyn málimdedi. Onyń aıtýynsha, vokzaldyń karnızderin qaptaý jumystary, vokzaldyń jylytylmaıtyn bóliginiń qasbetterin árleý, aýa almastyrý júıesin montajdaý, syrtqy elektrmen qamtý jumystary 90% aıaqtalǵan.
2017 jyldyń 1 mamyryna qaraı vokzal ǵımaratyndaǵy lıftter men eskalatorlardy montajdaý, iske qosý jáne jóndeý, tóńirekti abattandyrý jáne kógaldandyrý, sonymen qatar árleý jumystaryn aıaqtaý josparlanǵan.
Elordanyń jańa temirjol vokzaly aýmaǵyndaǵy ınjenerlik kommýnıkasııalar men jol qurylysy jumystarynyń barysy týraly Astana qalasy ákiminiń orynbasary Q. Aıtmuhametov esep berdi. Sondaı-aq, merdiger uıymdardyń basshylarynyń qurylys-montajdaý jumystaryn atqarý, jańa temirjol vokzalyn paıdalanýǵa berý qyzmetiniń jumystary týraly esepteri tyńdaldy.
Atalǵan nysan qurylysynda shamamen 1 150 adam jumys isteıdi. Astananyń jańa temirjol vokzaly táýligine 35 myń jolaýshy ótkizedi dep josparlanýda.