Qańtar aıynan bastap Shyǵys Qazaqstan oblysy boıynsha elektr energııasyna tarıf 5,5 paıyzǵa ósti.
– Bizdiń oblys Qazaqstan boıynsha úsh GES-i bar óńir bolyp sanalady, – deıdi Semeı qalasyndaǵy qoǵamdyq keńestiń tóraǵasy Nıkolaı Isaev. – Sondyqtan da aqylǵa salyp, oılanyp qarasaq, bizdegi elektr energııasyna degen baǵa ózge óńirlerge qaraǵanda arzan bolýy kerek. Gıdroelektrstansalar eń arzan elektr energııasyn óndiredi. Biraq, Buqtyrma GES-i «Qazsınk» JShS-ine berilgen. Osy GES eń arzan elektr energııasyn óndiredi. Bul bir, ekinshiden, Buqtyrma GES-i Semeı óńirine ekonomıkalyq jaǵynan da, ekologııalyq jaǵynan da tıimsiz ekendigi ras. Eń kóp sý tartylady jáne topyraqqa tazartylǵan zattar qaldyǵy túsedi. Osy GES-tiń arqasynda, ıaǵnı sýdy kóp tartatyndyqtan Semeıde keme qatynasy toqtap qaldy. Qazir osy GES-ti jekemenshikke alǵandar onyń elektr energııasynyń shamaly bóligin Reseıge satýda. Al oblys halqy, Semeı turǵyndary jyl saıyn qymbattaıtyn elektr energııasynyń aqshasyn tóleýge májbúr, al ózimizde eń arzan elektr energııasy bar ekendigin eshkim elemeıdi.
Nıkolaı Isaev bul sózderin tarıfti kóterýge baılanysty ótken jıyndarda únemi aıtýdan jalyqqan emes, biraq asa mán berip otyrǵan eshkim joq. Al elektr qýatynyń qymbattaýyn energetıkter «KEGOK» AQ, ShQ AEK syndy iri mekemelermen baılanystyrýda. Máselen, «KEGOK» AQ tarıfti ósirýdi aldaǵy bes jylǵa bekitip qoıǵan. Bes jyl ishinde shamamen olaı-bylaı ósýi múmkin degen boljamdar qoǵamdyq tyńdaýǵa qatysqan turǵyndardyń renishin týǵyzdy. Sondyqtan da, eger «KEGOK» AQ tarıfti kóterýdi zańdy túrde bekitip alǵan bolsa, «Shyǵysenergotreıd» JShS tarapynan ótkizilip otyrǵan osy qoǵamdyq tyńdaý bosqa ýaqyt alý degendi alǵa tartty. Jáne jınalǵandar depýtattarǵa saýal joldap, máseleni zań júzinde rettegen jón desti. Sóıtip, Semeı qalasynda elektr energııasyn satý tarıfterine arnalǵan qoǵamdyq tyńdaýda Shyǵys Qazaqstan oblysyn elektr energııasymen qamtamasyz etetin «Shyǵysenergotreıd» JShS endi bul qyzmettiń qunyn 5,51 paıyzǵa arttyratyndyqtaryn aıtty. Bıylǵy jyly jetinshi ret ótkizilip otyrǵan qoǵamdyq tyńdaý otyrysyna «Shyǵysenergotreıd» JShS dırektorynyń orynbasary Mstıslav Martemıanov qatysyp, bylaı dedi:
– Elektr qýatynyń tarıfin kóterýge májbúr bolyp otyrmyz. О́ıtkeni, kásiporynnyń turaqty jumys jasap, árbir turǵynǵa elektr qýatyn jetkizýi úshin jaryq qunyn kóterýge týra kelip tur. Sebebi, «KEGOK» AQ syndy elektr qýatyn jetkizýshi kompanııalar tarıfti ósirip otyr.
Jıynda ShQO boıynsha tarıf respýblıkadaǵy eń arzan tarıf degen másele de aıtyldy. Biraq qoǵamdyq keńes músheleri bul kókeıge qonymdy emes, halyqtyń turmysyn da esepke alý kerek deıdi.
Raýshan NUǴMANBEKOVA,
jýrnalıst
SEMEI