Qazirgi tańda uzaq merzimge jalǵa beriletin úılerdiń 85-90 paıyzy "kóleńkede", dep jazady kn.kz saraptamalyq qyzmeti. Osy oraıda, ýaqytsha tirkeý talaby jaldamaly baspana naryǵyna da óz áserin tıgizýi múmkin.
Saraptama qyzmetiniń júrgizgen saýalnamasy qorytyndysy boıynsha, úıdi jalǵa berýshilerdiń basym kópshiligi jalǵa alýshylarmen kelisimshart jasasýǵa daıyn otyr. Degenmen, keıde jalǵa alýshylar kelisimshart qurý men tirkeýge kelispeıdi. Basylymnyń habarlaýynsha, olardyń sany jalpy jalǵa alýshylardyń 10 paıyzyn quraıdy.
"Meniń oıymsha, atalǵan normanyń naryqqa áseri onyń qanshalyqty paıdaly ekenine baılanysty", - deıdi saraptama qyzmetiniń jetekshisi Anna Shaskaıa.
Onyń aıtýynsha, másele atalǵan normanyń saqtalýynda. "Jaldamaly úı naryǵy tez qubylatyndyqtan, ony baqylaýda ustaý úshin de jedel shara qoldaný kerek. Retteýshi organ sharasy (ýchaskilik polısııa tekserýi, eskertýler men aıyppuldar) qabyldanbaıynsha, "kóleńkede" jatqan jaldaýshylar óz qyzmetterin zańdastyrýǵa asyqpaıdy. Jalǵa alýshylar kóp jaǵdaıda qujat rásimdemegendikten, úıdiń jaldamaly ekenin tekserýshi organǵa dáleldeý múmkin emes deýge bolady", - deıdi sarapshy.
Jaldaǵany úshin salyq tóleý jaldaý aqysyn kóterip jiberedi
Saýalnamaǵa súıensek, arendaǵa berýshilerdiń kópshiligi óz isterin zańdastyrýǵa daıyn bolǵanymen, basym bóligi salyq organdaryna tirkelgisi joq. Eger jaldamaly úılerdi salyq organyna tirkeıtin bolsa, birden jaldamaly úı baǵasy kóterilip ketedi.
Naqtyraq aıtar bolsaq, salyq organdaryna tirkelgen jaǵdaıda, jaldamaly baspana baǵasy orta eseppen 7-10 paıyzǵa artady.