– Almatydaǵy qysqy Ýnıversıada 8 sporttyq nysanda ótkiziledi, onyń 6-ýy Almatyda, qalǵan 2-eýi Almaty oblysynda ornalasqan, – dedi Sergeı Sybenko. – Oıyndar úshin arnaıy eki jańa nysan salynyp, paıdalanýǵa berildi. Olardyń birinshisi – «Almaty Arena» 12 myń, al «Halyq Arena» 3 myń kórermendi qaýyzyna syıdyra alady. Bulardyń ekeýinde de muz aıdyny bar. Nysandar qajetti zamanaýı álemdik standarttarǵa túgel sáıkes keledi. Aınalyp kelgende, olar TMD aýmaǵyndaǵy eń úzdik sport ǵımarattarynyń biri sanalady. Almaty Olımpııa oıyndaryn ótkizýge de ótinim joldaǵandyqtan, barlyq sport nysandary men Atletter aýyly sońǵy tehnologııalardyń úlgisi boıynsha salyndy. Osy nysandarda eń joǵary deńgeıdegi halyqaralyq saıystardy, sonyń ishinde Olımpııa oıyndaryn da ótkizýge bolady. Bul ozyq úlgide jetildirilgen, eń zamanaýı nysandar bolyp tabylady. Bizdiń sport alańdarymyz ámbebap sıpatta, olarda sport is-sharalaryn ǵana emes, sonymen qatar, kommersııalyq, oıyn-saýyq túrindegi is-sharalardy ótkizýge bolady. Bizde osyǵan deıin salynyp qoıylǵan nysandar, atap aıtqanda, shańǵy tramplınder kesheni, «Medeý» joǵary taýly muz aıdyny, Balýan Sholaq atyndaǵy Sport saraıy týraly aıtar bolsaq, olarda birqatar qaıta qurý jumystary júrgizilip, kez kelgen jarystardy ótkizýge jaǵdaı jasaıtyn eń sońǵy jabdyqtar satyp alyndy. Almatydaǵy Ýnıversıada týraly habar álemniń 100-den asa elinde taratylady, ony tamashalaıtyn kórermen sany shamamen 1 mıllıardty quraıdy. Sondyqtan bizdiń búkil nysandarymyz halyqaralyq standarttar men normalarǵa sáıkestendirilip, barlyq sertıfıkattar, sonyń ishinde televızııa mamandarynan jáne sport salasyndaǵy quzyretti tulǵalardan sertıfıkattar alyndy.
– Osy sport nysandaryna tekserý qalaı júrgiziledi jáne halyqaralyq standarttarǵa sáıkestigi týraly sertıfıkattar qansha merzimge beriledi?
– Qysqy Ýnıversıada Halyqaralyq stýdenttik sport federasııasynyń (FISU) qamqorlyǵy aıasynda ótkiziledi. Degenmen, ol sondaı-aq qysqy sport túrleri halyqaralyq federasııalarynyń da baqylaýynda bolady. Árbir federasııa jarystar ótkiziletin ýaqytta óziniń tehnıkalyq delegatyn jiberedi. Biz barlyq standarttar men talaptardy olarmen kúndelikti túrde maquldastyryp otyramyz. О́ıtkeni, nysandar halyqaralyq federasııanyń sertıfıkattary men rásimderine sáıkes kelmeıtin bolsa, birde-bir jarys sóreden shyqpaıdy.
Ádette kez kelgen sertıfıkat belgili bir merzimge beriledi. Árbir halyqaralyq federasııada onyń merzimi ártúrli bolady. Mysaly, taý-shańǵy sportynda sertıfıkat birneshe jylǵa beriledi. Al hokkeı, konkı, short-trek sekildi sport túrleri týraly aıtar bolsaq, olar jyl saıyn geodezııa jóninde sertıfıkat alýlary tıis. Sebebi, olarda jyl saıyn muz alańy, joldar men muz betiniń eni durys belgilengenin rastap turý kerek bolady. Halyqaralyq jarystardy ótkizýge ruqsaty, lısenzııasy bar sertıfıkattalǵan mamandar kúlli belgileý jumystaryn júrgizedi. Shańǵy sportynda da osyǵan uqsas sertıfıkat beriledi. Bul úshin joldardy, yldıy men órin ólshep beretin maman shaqyrylady. Búkil jumys qatań rettelgen, óıtkeni, sportshylar, kórermender men tóreshilerdiń qaýipsizdigi osyǵan táýeldi. Bizdiń nysandarymyzdyń barlyǵy tolyǵymen búkil tekserýlerden ótip, qajetti sertıfıkattardy alǵan.
– Ýnıversıada aıaqtalǵan soń biz ózimizde úlken jarystardy ótkize alamyz ba?
– Álbette. Almatydaǵy qysqy Ýnıversıadanyń basty mindetteriniń biri de osynda. Bylaısha aıtqanda, osyndaı aýqymdaǵy jahandyq jáne ımıdjdik is-sharaǵa daıyndalý aıasynda biz ózimizdiń sporttyq bazamyzdy retke keltirip, jańa nysandardy salý kózdelgen. Sondaı-aq, biz urpaǵymyzǵa qaldyrar sporttyq mırasymyz týraly da umytpaýymyz qajet. Mysaly, «Halyq Arena» jáne «Almaty Arena» sekildi eki muz alańyn alaıyq. Biz jańa jylǵa deıin qalyń jurtshylyqtyń onda tegin syrǵanaýyna múmkindik berdik. Onyń nátıjesi orasan zor boldy, jurt kóptep keldi. Munyń ózi bizdiń adamdardy tarta alǵanymyzdy kórsetti. Buǵan osy eki alańnyń qala shetindegi aýdandarda ornalasýynyń da áseri mol boldy. Bul aýdandardyń turǵyndary úshin «Medeýge» nemese qalanyń ortalyǵyna baryp turýǵa árdaıym múmkindik bola bermeıdi. Al osy muz alańdarynyń salynýy sol máseleni sheship berdi. Biz sport nysandaryn qala ortalyǵynda ǵana emes, sondaı-aq, qala shetindegi aýdandarda da salýymyz qajet. Qaıtalap aıtyp óteıin, Ýnıversıada arqasynda biz kez kelgen deńgeıdegi jarystardy, tipti Olımpııa oıyndaryna deıin ótkizýge múmkindigimiz bar ekenin tanytyp otyrmyz.
Áńgimelesken
Serik PIRNAZAR,
«Egemen Qazaqstan»
ASTANA