Atyraýda da jol máselesi ótkir tur. Joldyń qadirin atyraýlyqtar ózgelerden jaqsyraq biletin shyǵar. О́ıtkeni, munaıly óńirdiń ortalyǵy sanalatyn Atyraý qalasyna azdaǵan ylǵal tússe, tabanyńa jelimdeı jabysar balshyǵymen júrý muńǵa aınalady. Onyń ústine qalanyń aýqymy shaǵyn aýdandarmen keńeıip keledi. Jańadan boı kótergen shaǵyn aýdandarda ınjenerlik ınfraqurylymdar júrgizilgenmen, jol salý tolyq sheshimin tapty deýge bolmaıdy. Bul másele turǵyndar tarapynan ásirese, ákimderdiń jyl saıynǵy esep berýinde oqtyn-oqtyn kóteriledi. Joldyń qajettigi Atyraý qalasynyń ákimshilik bólisine qaraıtyn eldi mekenderdiń barlyǵynda derlik baıqalady.
Máselen, ótken jyly munaıly qala men oǵan taıaý ornalasqan okrýgterde 95 shaqyrymǵa sozylǵan jol salynypty. Sonyń ishinde Jumysker jáne Jumysker-2 aýyldarynyń 19 kóshesine 8,9 shaqyrymdy quraǵan jol tóselgen. Mundaı jumys Erkinqala, Qursaı, Rakýsha aýyldarynda, «Balaýsa» jáne «Samal» shaǵyn aýdandarynyń 30-dan astam kóshesinde júrgizilipti. Atyraý qalasynyń ákimi Serik Shápkenovtiń málim etýinshe, bıyl bul jumystyń jalǵasýy qarjynyń bólinýine baılanysty bolmaq. Qazirdiń ózinde qala irgesindegi 30 eldi mekenniń 311 kóshesine jol tóseletindigi josparlanypty. Jobalyq-smetalyq qujaty daıyndalǵan joldyń uzyndyǵy 250 shaqyrymdy quraıdy. Biraq, munymen bul eldi mekenderdiń bárinde taqtaıdaı tegis jolmen tolyq qamtylady deýge bolmaıdy. О́ıtkeni...
– Birneshe eldi mekenderde jol qurylysyn júrgizý úshin áli de jobalyq-smetalyq qujattamasyn jasaqtaý qajet. Qazir Qursaı, Erkinqala sekildi qalalyq ákimdikke qarasty ózge de eldi mekenderge jol tóseý úshin osyndaı jumystar jasalýda, –deıdi qala ákimi Serik Shápkenov.
Ras, jol salý jumystary ákim mysalǵa keltirgen eldi mekendermen ǵana shektelmeıdi. О́ıtkeni, «Juldyz», «Kóktem», «Birlik-2» sekildi shaǵyn aýdandar turǵyndary da joldyń azabyn tartyp keledi. Bul shaǵyn aýdandardyń bárinde de jeke ıeliktegi turǵyn úıler salǵan turǵyndardyń ásirese, kóktem, kúz aılarynda qatynaýynyń qıyndyǵyn basqa bermesin deńiz. Sonymen birge, olar úshin «jedel járdem» qyzmetin shaqyrý da ońaı emes. Al «Kókarna» shaǵyn aýdanynyń bir kóshesin meken etken turǵyndardyń óz kúshterimen jolǵa qurylys qaldyqtaryn tókkenine kýá bolǵanymyz bar. Endi ótken jyldyń kúzinen beri «Bereke» atalatyn taǵy bir shaǵyn aýdanda da turǵyn úı qurylysy jandana bastady. Joba boıynsha munda 11 kóp qabatty turǵyn úı boı kóteredi. Demek, dál osy turǵyn alabynyń ózine de jol qurylysy salynýy qajet.
Qalaı degende de, jaıaý júrginshilerge arnalǵan jolaqty aıtpaǵannyń ózinde kólik júretin joldyń jyry bul óńirde de ázirge bite qoıar túri kórinbeıdi. Mamandardyń pikirinshe, jol qurylysy qarajatty molynan qajet etetinge uqsaıdy. Árıne, qarjy tabylǵanmen, jol degenińiz birden salyna qoımaıdy. Onyń aldyn-ala jasalatyn jobalyq-smetalyq qujattamasynyń ózine qyrýar qarjynyń jumsalatynyn aıtady. Biraq, báribir jol bolmaı turǵyndar kóńili jaı tappaıtyny da beseneden belgili. Atyraý qalasynyń irgesindegi eldi mekender men shaǵyn aýdandarǵa jol tóselse, bul aldymen turǵyndardyń turmysyna oń áser etetini daýsyz. Sonda olar ózderi turatyn kóshelerde shashtaraz, dúken, kafe sekildi shaǵyn jáne orta bıznestiń órkendeýine úles qosar nysandar ashar ma edi?
Joldasbek ShО́PEǴUL,
«Egemen Qazaqstan»
Atyraý oblysy