Qalaýlylar halyqpen kezdesýler ótkizdi

Oblysta jumys saparymen júrgen Parlamenti Májilisiniń depýtattary Vladımır Bojko, Baqtyqoja Izmuhambetov, Quralaı Qareken, Gleb Shegelskıı, Abaı Tasbolatov Q.Jubanov atyndaǵy Aqtóbe óńirlik memlekettik ýnıversıtetinde «Erkin pikir» alańynda jastar uıymdary ókilderimen kezdesti. Oblys ákiminiń orynbasary Asqar Sherııazdanov depýtattardy jeke-jeke tanystyra kelip, olardyń oblystyń birqatar ónerkásip kásiporyndary men aýyl sharýashylyǵy qurylymdarynda, birqatar aýdandarda bolyp, jumysshy­lar­men jáne turǵyndarmen kezdeskenin jetkizdi. Jastarmen júzdesýde sóz alǵan Parla­ment Májilisi Tóraǵasynyń oryn­basary Vladımır Bojko depýtattar­dyń oblys ortalyǵynda jáne aýdandar­da kóp­te­gen kezdesýler ótkizip, Elba­sy júrgizip otyrǵan saıasatty, «100 naqty qadam» Ult josparynda aıqyndalǵan tapsyrmalardyń oryndalý barysyn túsindirgenin tilge tıek etti. Kásiporyndarda, eńbek ujymdarynda jáne oqý oryndarynda bolǵan kezdesý­lerge qatysýshylardyń keıbir utymdy usynystary Parlamenttegi jumysta basshylyqqa alynatynyn aıtty. Májilis depýtattary jastardyń aza­mat­tardy ýaqytsha tirkeý, joǵary oqý oryn­darynda qazaq tilindegi tehnıkalyq oqýlyq­tardyń jetispeýshiligi, az qamtyl­ǵan otbasylarynan shyqqan jáne bel­sendi jastarǵa qarjy granttaryn bólý sekildi máselelerge qatysty jáne basqa saýal­daryna tolyqqandy jaýap berdi. Satybaldy SÁÝIRBAI, «Egemen Qazaqstan» Aqtóbe oblysy *** Parlament Senatynyń depýtattary Qaırat Ishanov pen Sársenbaı Eńsegenov Atyraý oblysynda óńir basshysy Nurlan Noǵaevpen kezdesip, onda aımaqtyń áleýmettik-ekonomıkalyq damý keleshegi talqylandy. Q.Ishanov bekire tuqymdas balyq ósi­re­tin zaýytta jáne toqyma ónimderin shy­ǵaratyn «Kaspıı Lana Atyraý» kásip­ornynda bolyp, eńbek ujymdarymen kezdesti. Al S.Eńsegenov Isataı jáne Jylyoı aýdandarynda jergilikti máslıhat depýtattarymen, ákimdik qyzmetkerlerimen, quqyq qorǵaý jáne buqaralyq aqparat quraldarynyń ókilderimen, sharýa qojalyqtarynyń jetekshilerimen jáne jergilikti turǵyndarmen kezdesti. Senatorlardyń jurtshylyqpen júz­desý­­l­erin­de Senat qabyldaǵan zańdar men «О́ńir» depý­tattyq tobynyń qyzmeti týraly aı­tyl­dy. Sondaı-aq, Elbasynyń «100 naqty qadam» Ult josparyn iske asyrý, res­pýb­lı­ka­l­yq bıýdjettiń atqa­rylýy men Kásip­ker­lik kodeksine qatys­ty máseleler de qamtyl­dy. Azamat­tardy qabyldaýǵa 5 adam keldi. Senatorlar keıingi kúnderde Inder, Maqat, Mahambet jáne Qurmanǵazy aýdandaryna da baryp, eńbek ujym­dary­men kezdesýler ótkizdi.  Joldasbek ShО́PEǴUL, «Egemen Qazaqstan» Atyraý oblysy *** Senator Sergeı Ershov Qaraǵandy oblysyndaǵy Qarqaraly aýdanynda jumys babyndaǵy saparmen boldy. Qarshyǵaly aýyldyq okrýginde depýtat jergilikti sharýa qojalyqtarynyń jetekshileri jáne aýyl sharýashylyǵy ónimderin óndirýshilerimen kezdesti. Júzdesý barysynda Parlament Sena­tynda qaralyp jatqan «Jaıylym­dar týraly» jáne «Qazaqstan Respýb­lıkasynyń keıbir zańnamalyq aktilerine jaıylymdardy paıdalaný máseleleri boıynsha ózgerister men tolyqtyrýlar engizý týraly» zań jobalarynyń erejeleri talqylandy. Jergilikti turǵyndar jeke úı-jaıdy ustaý maqsatyndaǵy jaıylym jerlerdi, sondaı-aq jaıylymdardy tıimdi paıdalanýdyń ózekti máselelerin zańnamalyq turǵyda retteýge basa nazar aýdaryp otyr. Sharýa qojalyqtarynyń jetekshileri men aýyl sharýashylyǵy ónimderin óndi­rý­shiler agrarlyq jáne veterınarııa sala­laryn retteýge baılanysty birqatar máse­lelerdi kóterdi. Aýdandyq máslıhat depýtattarymen kezdesý barysynda S.Ershov «100 naqty qadam» Ult josparyn zańnamalyq turǵy­da iske asyrý jónindegi Parlament­tiń zań shyǵarý jumystary týraly aıtyp berdi. Qaırat Ábildınov, «Egemen Qazaqstan» Qaraǵandy oblysy *** Senat depýtattary Rashıt Ákimov pen Jabal Erǵalıev óńirlerge sapary barysynda Aqmola oblysynyń Ereımentaý aýdanynda bolyp, jergilikti máslıhat depýtattarymen, aýdandyq qoǵamdyq kelisim múshelerimen jáne aýdan aktıvimen kezdesti. Bilim berý salasy men óndiris nysan­daryn, Bógenbaı batyr atyn­daǵy­ tarıhı-ólketaný mýzeıin aralap, muǵalim­dermen, mádenıet qyzmetker­lerimen, jumysshylarmen pikir almasty. Aýdandyq ákimdiktiń májilis zalynda ótken kezdesýdi Ereımentaý aýdanynyń ákimi Ermek Nuǵymanov ashyp, óńirdiń áleýmettik-ekonomıkalyq damýy ja­ı­yn­da habarlama jasady. Aýdan aktıvi aldynda senatorlar sóz sóılep, qoıylǵan suraqtarǵa jaýap berdi. Pikir almasý barysynda Ereımentaý aýdandyq más­lıhatynyń depýtaty, «Hamze» sharýa qojalyǵynyń basshysy Erjan Bıekenov «Astana – Pavlodar» baǵytyndaǵy jolǵa qatysty oılaryn ortaǵa saldy. Ereımentaý qalasyndaǵy «№811 avtomobıl jóndeý zaýyty» aksıonerlik qoǵamynyń kásipornynda, ótken jylǵy jańa oqý jylynda paıdalanýǵa berilgen Ereımentaý qalasyndaǵy №4 orta mektepte jáne Bógenbaı batyr atyndaǵy tarıhı-ólketaný mýzeıinde bolǵan Rashıt Ákimov pen Jabal Erǵalıev jumys­shylarmen, ınjener-tehnık mamandarmen, muǵalimdermen jáne mádenıet qyzmetkerlerimen oı bólisti. Qazir negizinen Qorǵanys  mınıstr­liginiń ótinim­derin oryndap, áskerı tehnı­kalardy jóndep, qalpyna keltirý­men aınalysatyn avtomobıl jóndeý zaýy­tynyń bas dırektory Erjan Kárimov ózderinde kez kelgen tapsyrysty oryn­daýǵa tolyq múmkindikter bar ekenin aıtty. Qazir zaýyt 200-ge jýyq adamdy jumys ornymen qamtamasyz etip otyr. Baqbergen AMALBEK, «Egemen Qazaqstan» Aqmola oblysy *** Parlament Senatynyń depýtaty Qýanysh Aıtahanov jumys babyndaǵy saparmen Ońtústik Qazaqstan oblysyndaǵy birqatar aýdandarda boldy. Depýtat sapary barysynda Báıdibek, Otyrar, Túlkibas jáne Túrkistan aýdandarynda jergilikti atqarýshy bıliktiń basshylyǵymen, máslıhat depýtattarymen, jurtshylyqpen, orta jáne shaǵyn bıznestiń, úkimettik emes uıymdardyń ókilderimen, aýdan jastarymen kezdesti. Q.Aıtahanov aımaqtaǵy jergilikti tur­ǵyn­darmen bolǵan júzdesýlerde El­basy­nyń «100 naqty qadam» Ult jos­pary­­nyń aıa­syn­daǵy bes ınstıtýttyq refor­many iske asyrý barysy týraly habar­dar etti. Sena­tor sondaı-aq Memleket basshy­sy­­nyń Qazaq­stan Táýelsizdiginiń 25 jyl­dy­ǵy­na arnalǵan saltanatty jınalysta sóıle­gen sózinde aıtylǵan mindetterge jan-jaqty toqtala kelip, zań shyǵarý ju­mys­tary­nyń jospary jáne ony iske asyrý­daǵy parlamentshilerdiń qyzmeti týraly áńgimeledi. Baqtııar TAIJAN, «Egemen Qazaqstan» Ońtústik Qazaqstan oblysy *** Senat depýtaty Manap Kóbenov Pavlodar oblysynda jumys babyndaǵy saparyn odan ári jalǵastyrdy. Senator Jelezın aýdanynda «Pahar» sharýa qojalyǵynda boldy. Kásiporyn ókilderi óndiristi odan ári damytý josparlary týraly aıta kelip, ınfraqurylym jaǵdaıymen tanystyrdy jáne turǵyn úı kesheni men demalys ortalyǵyn kórsetti. Jelezınka aýylynda M.Kóbenov aýdandyq ortalyq aýrýhanasynyń eńbek ujymymen kezdesti. Depýtat perzenthanada, hırýrgııa bóliminde jáne emhanada boldy, shala týǵan sábılerge arnalǵan jabdyqtarmen tanysty. Jelezın jalpy bilim beretin №1 orta mekteptiń muǵalimderimen kezdesýde on eki jyldyq bilim berýge, shaǵyn jabdyqtalǵan mektepterdiń jabylýy men arnaıy pánderdi aǵylshyn tilinde oqytýǵa baılanysty máseleler talqylandy. M.Kóbenovtiń Jelezın aýdanyndaǵy ardagerlerdiń bastaýysh uıymdary­nyń ókilderimen kezdesýinde zeınetaqy­nyń ósýi men shaǵyn aýyldardaǵy sý qubyrynyń qurylysyna baılanysty áleýmettik máseleler kóterildi. Farıda BYQAI, «Egemen Qazaqstan» Pavlodar oblysy *** Parlament Májilisi depýtaty Serik Úmbetov Almaty oblysyna sapary aıasynda Ile jáne Qarasaı aýdandaryn aralady. Aldymen Ile aýdanyndaǵy «Danon Berkýt» sút zaýytynyń jumysymen tanysty. «Damý» ındýstrııalyq-logıstı­ka­lyq ortalyǵynda ornalasqan sút zaýyty­nyń jumysy jaıly «Danon» kompanııa­synyń Ortalyq Azııa jáne Kavkaz elderi boıynsha Bas dırektory Reno Shamonal baıandady. Onyń aıtýynsha, qazirgi kezde kásiporynnyń ónimderi Qazaq­stan, Qyrǵyzstan, О́zbekstan, Túrikmenstan, Tájikstan, Ázerbaıjan, Grýzııa, Armenııa, Mońǵolııa syndy toǵyz elge shyǵarylady jáne atalǵan memleketterde turatyn 80 mıl­lıonnan astam tutynýshynyń suranysy men talabyna saı bolyp otyr. Sondaı-aq, Serik Úmbetov «Damý» ındýs­t­rııal­yq-logıstıkalyq ortaly­ǵynyń bas keńse­sine de bas suǵyp, «Amanat Invest Group» JShS prezıdenti ári quryltaıshysy Sáken Toılybaevpen orta­lyq jumysynyń búgini men bola­shaǵy jaıly áńgimelesti. Sapar aıasynda «Mejdýrechensk Agro» mal sharýashylyǵy fermasyn aralady. Munan keıin depýtat Qarasaı aýdany­na at basyn buryp, «Shyny zaýyty» JShS eńbek ujy­my­men júzdesti. Qytaı men Qazaqstannyń ózara árip­testigi nátıje­sinde boı kótergen zaýyt kesheninde óndiris­tik ǵımarattarmen bir­ge, ju­mys­­shy­larǵa arnalyp áleýmettik-tur­mys­­tyq nysandar salynǵanyna nazar aýdardy. Nurbol ÁLDIBAEV, «Egemen Qazaqstan» Almaty oblysy *** Syrym aýdanyna jumys saparymen Parlament Senatynyń depýtaty Erbolat Muqaev keldi. Aýdan ortalyǵynda áleýmettik nysandardyń jumysymen tanysqan senator «Nur Otan» partııasy Syrym aýdandyq fılıalynyń májilis zalynda jergilikti kásipkerlermen júzdesti. Kezdesýdi júrgizgen Syrym aýdany­nyń ákimi Abat Shynybekov óziniń sózinde aýdandaǵy kásipkerlik salasynyń búgingi baǵyt­tary jaıly baıandady. Al Syrym aýda­ny­­nyń kásipkerleri depýtattyń aldy­na ózderi úshin ózekti bolyp otyr­ǵan máse­le­­lerdi qoıdy. Onyń bireýi – aýyl­sharýa­shy­lyq salasyndaǵy jaıylymdyq jer­ler­di paıdalaný máselesi. Qazirgi kúni jaıy­lym taryldy. Tarylýdyń bir sebebi, mal basynyń óskeninde. Osyǵan baılanysty aldaǵy turǵan bir jumys – eldi mekenderdiń ıeligindegi jerdi keńeıtý. Keńeıtý keıbir sharýashylyqtardyń paıdasyndaǵy jerler arqyly da júzege asyrylýy múmkin. Aýyl sharýashylyǵymen aınalysatyn aýdan sharýalary memlekettik baǵdarla­ma­lar arqyly nesıe alǵany úshin tólene­tin memlekettik sýbsıdııa nelikten toqtap tur degen saýal qoıyldy. Bul saýal da sena­tor­dyń qoıyn dápteriniń ishine túr­tilip ketti. Naqty jaýap keıin beriletin bolady. Qazirgi kúni aýyl sharýashyly­ǵyn qarjylandyrýǵa arnalǵan memleket­tik baǵdarlamalardy júzege asyrý ortalyq­taryn­da óńkeı qarjygerler, zańgerler jınal­ǵan. Al naqty sharýashylyqtyń jaıyn bilip, zerdeleıtin agronom da, zootehnık te joq. Kezdesýde osy másele de sóz boldy. Kezdesýdi aýdan ákimi qorytyndylady. Temir QUSAIYN, «Egemen Qazaqstan» Batys Qazaqstan oblysy *** Parlament Májilisiniń depýtattary Muhtar Erman men Fahredın Qarataev Jambyl aýdany, Bektóbe aýylyndaǵy «BınomStroıDetal» JShS-niń tynys-tirshiligimen tanysty. Jumysyn 2010 jyly bastaǵan seriktes­tik alǵashynda sý sharýashylyǵyna arnal­ǵan lotoktar óndirip, úıge qajetti jab­dyqtar shyǵarýmen aınalysypty. Búgin­de zaýyt 125 adamdy jumyspen qamtyp otyr. Jumysshylardyń orta­sha jalaqysy 80-90 myń teńge. О́tken jyly kásiporyn 80 páterlik bir úı, 60 páterlik eki úıdiń qurylysyn tolyq aıaqtap, qoldanýǵa bergen. Nemis tehno­logııa­symen jumys jasaıtyn kásiporyn aǵymdaǵy jyly aýdandarda ózderiniń fılıaldaryn ashyp, 3-5 qabatty úıler salýdy josparlaýda. – Atqarylyp jatqan jumystar­dyń qar­qyny jaqsy. Dese de aldaǵy ýaqyt­ta qanaty­myzdy keńge jaıyp, qo­sym­sha fılıaldar ashyp, jumys or­nyn kóbeıtsek degen josparymyz bar. Búginde «Báıterek» holdıngimen kel­i­sim-shartqa turdyq. Úıler­di jalǵa berý, satý syndy jumystarmen atalǵan se­riktes­tik aınalysady. О́tken jyly aıy­na 2 myń sharshy metr úı salsaq, bıyl bul kórsetkishti 3 myńǵa jetkizýdi oılastyrýdamyz. Zaýyt shyǵarǵan taýardan byltyr 560 mln teńge qarjy tústi, – deıdi «BınomStroıDetal» JShS dırektory Keńeshan Aralbekov. Parlament Májilisiniń depýtattary kez­desý barysynda memlekettik baǵdar­la­ma aıasynda júzege asyrylýy tıis birqatar máse­lelerdi ortaǵa saldy. Sondaı-aq, eki kúnge josparlanǵan saparlary bary­synda Májilis depýtattary basqa  da aýdan­darda bolyp, halyqpen kezdesip, iri kásip­oryndar men bilim nysandarynyń jumysymen tanysty.  Oralhan DÁÝIT, «Egemen Qazaqstan» Jambyl oblysy *** Májilis depýtaty Amangeldi Aıdaruly «Almaty steklo» shyny zaýytyna baryp, óndiris ornynyń jumysymen tanysty. Táýelsizdiktiń 25 jyldyǵy qarsańynda ashylǵan bul zaýyt Qazaqstan jáne Qytaı ınvestorlarynyń 100 mıllıard teńge qarjysyna salynǵan. Qazirgi tańda munda onshaqty túrli, alýan kólemdegi shyny ydys­tar jáne olarǵa arnalǵan arnaıy qaq­paqtar shyǵarylady. Qytaıda óndirilgen qurylǵylarmen jumys isteý úrdisin jer­gilikti jumyskerlerge Aspanasty elinen kelgen sheberler úıretýde. Bolashaqta zaýyt tolyq iske qosylǵanda munda 500-ge jýyq adam jumyspen qamtylmaq. Ázirdiń ózinde tórt aýysymmen jumys isteıtin óndiris ornynda 300-den asa adam eńbek etýde. Májilis depýtaty eń aldymen, zaýyttyń jas mamandary men jumysshylarynyń óndi­ris ornyndaǵy qaýipsizdigi jáne áleý­met­tik jaǵdaıymen tanysty. Olardy maza­la­ǵan saýaldarǵa jaýap berip, qazirgi tańda eli­mizde jas otbasylardyń baspana máse­le­sin sheshýge septigi tıetin «Nurly jer» baǵ­dar­lamasynyń erekshelikterin túsindirdi. Budan keıin Amangeldi Aıdaruly Almaty oblysynyń Kóksý, Ile, Alakól,  Ilııas Jansúgirov atyndaǵy  aýdandaryna baryp, «Nurly jol» jáne «Nurly jer» memlekettik baǵdarlamalarynyń oryndalý barysymen tanysty. Sapar barysynda saılaýshylar aıtqan usynystar men ótinish­terdi bolashaqta Úkimet otyrys­taryn­da másele etip qoıatynyna sendirdi.  Talǵat SÚIINBAI, «Egemen Qazaqstan» ALMATY *** Qyzyljar óńirine jumys saparymen kelgen Parlament Májilisiniń bir top depýtaty eldi mekenderdi aralap, jurtshylyqpen kezdesti. Sondaı maǵynaly júzdesýdiń biri Mamlıýt aýdanynda ótti. Onda depýtattar Petr Sharapaev, Sergeı Zvolskıı aýdan turǵyndarymen ashyq áńgimelesip, qordalan­ǵan problemalardy birigip sheshýdiń jo­l­daryn ortaǵa saldy. Jıynda zeınetker Ekaterına Bogýsh jastar arasyndaǵy jumyssyzdyq máselesin qozǵady. Onyń aıtýynsha, aýyldyq jerlerde tokar, mehanık, kombaınshy, traktorshy sekildi mamandyqtar jetispeıdi. Sondyqtan kásiptik baǵdarlaý jaıyna erekshe nazar aýdarý kerek. Parlament Májilisiniń depýtattary bul baǵyt boıynsha Úkimettiń arnaıy baǵdarlama ázirlep, naqty sharalar qabyldaǵanyn jet­kizdi. Ústimizdegi jyldan bastap kásiptik bilim berý memleket qarjysy esebinen atqarylady. Kolledj-ýchılısheler salý oılastyrylǵan. Kezdesýde shekaralas aımaqtarda ornalas­qan oblys jastarynyń Reseıge oqýǵa kóptep baratyny aıtylyp, onyń basty sebebine Qazaqstanda oqý aqysynyń tym qymbattyǵy kóldeneń tartyldy. Bıyl on mamlıýttik jas kórshi eldiń joǵary oqý oryndaryna túsipti. Jaǵdaı osylaı jalǵasa berse, dıplomdy mamandar tapshylyǵy týyndaıdy. Kezdesýde áleýmettik salalarǵa qatysty basqa da jaıttar, eldi mekenderde «Agrobız­nes-2020» baǵdarlamasyn, kásipkerlikti, AО́K-ti damytýdyń joldary talqylandy. О́mir ESQALI, «Egemen Qazaqstan» Soltústik Qazaqstan oblysy