Qazaqstan Respýblıkasy Prezıdentiniń Jarlyǵy №404

«B» korpýsynyń memlekettik ákimshilik qyzmetshilerin attestattaýdy ótkizý týraly «Qazaqstan Respýblıkasynyń memlekettik qyzmeti týraly» 2015 jylǵy 23 qarashadaǵy Qazaqstan Respýblıkasy Zańynyń 63-baby 1-tarmaǵyna sáıkes QAÝLY ETEMIN: Qosa berilip otyrǵan «B» korpýsynyń memlekettik ákimshilik qyzmetshilerin attestattaýdy ótkizý qaǵıdalary bekitilsin. «B» korpýsynyń memlekettik ákimshilik qyz­met­shi­lerin attestattaý 2017 jylǵy 1 shildege deıin ótki­zil­sin. Qazaqstan Respýblıkasynyń Memlekettik qyz­met isteri jáne sybaılas jemqorlyqqa qarsy is-qı­myl agenttigi ortalyq memlekettik jáne jergilikti at­qa­rýshy organdarmen birlesip: 1) «B» korpýsynyń memlekettik ákimshilik qyz­metshilerin attestattaýdy; 2) «B» korpýsynyń memlekettik ákimshilik qyz­met­shilerin attestattaýdy ótkizý tártibi máseleleri boıynsha túsindirý jumysyn júrgizýdi qamtamasyz etsin. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin. Osy Jarlyq alǵashqy resmı jarııalanǵan kúninen bastap qoldanysqa engiziledi. Qazaqstan Respýblıkasynyń Prezıdenti N.NAZARBAEV   Astana, Aqorda, 2016 jylǵy 30 jeltoqsan  №404

Qazaqstan Respýblıkasy Prezıdentiniń  2016 jylǵy 30 jeltoqsandaǵy   №404 Jarlyǵymen BEKITILGEN «B» korpýsynyń memlekettik ákimshilik qyzmetshilerin attestattaýdy ótkizý QAǴIDALARY

1. Jalpy erejeler 1. «B» korpýsynyń memlekettik ákimshilik qyzmetshilerin attestattaýdy ótkizýdiń osy qaǵı­dalary (budan ári – Qaǵıdalar) «Qazaqstan Respýblıkasynyń memlekettik qyzmeti týraly» 2015 jylǵy 23 qarashadaǵy Qazaqstan Res­­pýb­lıkasynyń Zańy (budan ári – Zań) 63-ba­­bynyń 1-tarmaǵyna sáıkes ázirlendi jáne «B» korpýsynyń memlekettik ákimshilik qyzmet­­shilerin (budan ári – «B» korpýsynyń qyzmet­­shileri) attestattaýdy ótkizý tártibin aıqyndaıdy. 2. Attestattaýdyń maqsaty «B» korpýsy qyzmetshileriniń kásibı daıyndyq deńgeıin jáne atqaratyn laýazymdaryna sáıkestigin aıqyndaý bolyp tabylady. 3. Attestattaýdan «B» korpýsynyń qyzmet­shileri ótedi, oǵan tómendegiler qosylmaıdy: 1) attestattaýdan ótkizý kezinde «Qazaqstan Respýblıkasynda zeınetaqymen qamsyzdandyrý týraly» Qazaqstan Respýblıkasynyń Zańynda belgilengen zeınetkerlik jasqa tolýyna eki jyl jáne odan az ýaqyt qalǵan «B» korpýsynyń qyzmetshileri. Osy tarmaqshanyń birinshi bóliginde kórsetilgen merzim 2017 jyldyń 5 qańtarynan 30 maýsymyn qosa alǵandaǵy aralyqta bastalsa, bul «B» korpýsynyń qyzmetshilerin attestattaýdan ótýden bosatýǵa negiz bolyp tabylady; 2) júktilik pen bosanýǵa, sondaı-aq bala kútimine baılanysty demalystaǵy «B» korpýsynyń qyzmetshileri; 3) júktiligi týraly medısınalyq qorytyndy usynǵan júkti áıelder, úsh jasqa deıingi balalary bar áıelder, on tórt jasqa deıingi balany (on segiz jasqa deıingi múgedek balany) tárbıelep otyrǵan jalǵyzbasty analar, kórsetilgen sanattaǵy balalardy anasyz tárbıelep otyrǵan basqa da adamdar; 4) tıisti attestattaý komıssııasynda áńgime­lesýden ótý sátinde memlekettik qyzmet ótili alty aıdan az, memlekettik ákimshilik laýazymǵa alǵash ret taǵaıyndalǵan adamdar; 5) «A» korpýsy memlekettik ákimshilik qyzmetiniń kadr rezervinde turǵan «B» korpýsynyń qyzmetshileri. 4. Attestattaý kezeńderin ótkizý merzimderi kózde­letin «B» korpýsy qyzmetshilerin attestat­taýdyń jalpy kestesin (budan ári – jalpy keste) memlekettik qyzmet isteri jónindegi ýákiletti organ (budan ári – ýákiletti organ) bekitedi jáne onyń ınternet-resýrsynda ornalastyrylady. Memlekettik organdar jáne jergilikti atqarýshy organdar jalpy kesteniń negizinde «B» korpýsy qyzmetshilerin attestattaýdy ótkizý kestesin derbes bekitedi. 5. Attestattaýdan ótýge jatatyn «B» korpýsy­nyń qyzmetshilerine jyl saıynǵy eńbek demalysyn berý, olardy qyzmettik issaparǵa, taǵy­lymdamaǵa, sondaı-aq qaıta daıarlaý jáne bi­lik­ti­likti arttyrý kýrstaryna jiberý attestattaýdy ót­kizý kestelerin eskere otyryp, júzege asyrylady. Qazaqstan Respýblıkasy Prezıdenti Ákim­shi­liginiń, Qazaqstan Respýblıkasy Premer-Mı­nıstri Keńsesiniń jáne Qazaqstan Respýblıkasy Parlamenti palatalary apparattarynyń «B» korpýsy qyzmetshilerin qospaǵanda, attestattaýdan ótýge jatatyn «B» korpýsy qyzmetshileriniń konkýrstarǵa qatysýyna, sondaı-aq olardy memlekettik ákimshilik laýazymǵa aýysý tártibimen taǵaıyndaýǵa tıisti attestattaý komıssııasynyń qabyldanǵan sheshimi bolǵan jaǵdaıda ǵana jol beriledi. Bul talap ýaqytsha bos laýazymdardy atqaratyn adamdarǵa qoldanylmaıdy. 6. Attestattaý kezeńinde oqý demalysynda, eńbekaqysy saqtalmaıtyn demalysta, uzaq issaparda bolǵan nemese naýqastanýy saldarynan jumysta bolmaǵan, sondaı-aq halyqaralyq jáne ózge uıymdarǵa issaparǵa jiberilgen «B» korpýsynyń qyzmetshileri attestattaýdan jumysqa shyqqannan keıin alty aıdyń ishinde 2017 jyldyń sońyna deıin ótedi. Qazaqstan Respýblıkasynyń shet elder­degi mekemelerine jumysqa jiberilgen dıplo­matııalyq qyzmet personaly 2017 jyldyń sońyna deıin attestattaýdan ótýge tıis. Memlekettik organdarǵa issaparǵa jiberilgen adamdar attes­tattaýdy osy Qaǵıdalardyń erejelerine sáıkes ótedi. 7. «B» korpýsynyń qyzmetshileri atqaratyn laýazymdarynyń sanattaryna baılanysty attestattaýdy tıisti deńgeıdegi attes­tattaý komıssııalarynda ótedi: birinshi deńgeıde – Qazaqstan Respýblıkasynyń Prezıdenti janyndaǵy Joǵary attestattaý komıssııasy (budan ári – JAK); ekinshi deńgeıde – ortalyq memlekettik organ­dardyń, olardyń vedomstvolarynyń, orta­lyq memlekettik organdardyń jáne olar­dyń vedomstvolarynyń oblystardaǵy, respýb­lıkalyq mańyzy bar qaladaǵy, astanadaǵy aýmaq­tyq bólimsheleriniń, sondaı-aq oblystardyń, respýblıkalyq mańyzy bar qalanyń, astananyń ákimi apparattarynyń attestattaý komıssııalary; úshinshi deńgeıde – ortalyq memlekettik organdardyń jáne olardyń vedomstvolarynyń aýdandardaǵy, qalanyń aýdandaryndaǵy jáne oblystyq mańyzy bar qalalardaǵy aýmaqtyq bólimsheleriniń, sondaı-aq aýdandardyń, qala aýdandarynyń jáne oblystyq mańyzy bar qalalarynyń ákimi apparattarynyń attestattaý komıssııalary. 8. JAK quramyna Qazaqstan Respýblıkasynyń Prezıdenti Ákimshiligi Basshysynyń orynbasary, Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy, Qazaqstan Respýblıkasynyń Premer-Mınıstri Keńsesiniń Basshysy, Qazaqstan Respýblıkasy Parlamentiniń Senaty men Májilisin teń negizde bildiretin Qazaqstan Respýblıkasy Parlamentiniń depýtattary, Qazaqstan Respýblıkasy Prezıdenti Ákimshiligi qurylymdyq bólimsheleriniń basshylary, akademııalyq ortanyń jáne qoǵamdyq birlestikterdiń ókilderi kiredi. «B» korpýsynyń qyzmetshisimen áńgimelesý barysynda ol jumys isteıtin memlekettik organnyń birinshi basshysynyń orynbasarynan tómen emes laýazymdy atqaratyn adam JAK quramyna engiziledi. JAK quramy ýákiletti organnyń usynymy boıynsha Qazaqstan Respýblıkasy Prezıdentiniń Ákimshiligi Basshysynyń aktisimen bekitiledi. 9. Ekinshi jáne úshinshi deńgeıdegi attestattaý komıssııalarynyń quramyna «A» korpýsynyń memlekettik ákimshilik qyzmetshileri, onyń ishinde joǵary turǵan memlekettik organdardan, aldyńǵy deńgeıde attestaýdan sátti ótken «B» korpýsynyń qyzmetshileri, onyń ishinde qurylymdyq bólimshelerdiń basshylary, ádep jónindegi ýákilder, qoǵamdyq keńesterdiń, ǵylymı-sarapshylyq, akademııalyq ortanyń, qoǵamdyq birlestikterdiń ókilderi, sondaı-aq ýákiletti organnyń ádep keńesteriniń músheleri kire alady. 10. Ortalyq memlekettik organdarda jáne olardyń vedomstvolarynda qurylatyn attestattaý komıssııalary quramyna Parlament Senatynyń jáne Májilisiniń depýtattaryn tartýǵa jol beriledi. Ortalyq memlekettik organdardyń jáne olardyń vedomstvolarynyń oblystardaǵy, respýblıkalyq mańyzy bar qaladaǵy, astanadaǵy, aýdandardaǵy, qalanyń aýdandaryndaǵy jáne oblystyq mańyzy bar qalalardaǵy aýmaqtyq bólimshelerinde, sondaı-aq oblystardyń, respýblıkalyq mańyzy bar qalanyń, astananyń, aýdandardyń, qala aýdandarynyń jáne oblystyq mańyzy bar qalalardyń ákimi apparattarynda qurylatyn attestattaý komıssııalarynyń quramyna tıisti máslıhattardyń depýtattaryn tartýǵa jol beriledi. 11. Quqyq qorǵaý jáne arnaýly memlekettik organdarda, sondaı-aq Qarýly Kúshterdiń memle­kettik mekemelerinde qurylatyn attestattaý ko­mıs­sııalarynyń quramyna tıisinshe quqyq qor­­ǵaý, arnaýly memlekettik organdardyń qyz­met­kerlerin, sondaı-aq áskerılerdi qosýǵa jol beriledi. 12. JAK-tyń jumys organy ýákiletti organ bolyp tabylady, al ekinshi jáne úshinshi deńgeılerdegi attestattaý komıssııalarynyń jumys organy – personaldy basqarý qyzmetteri (kadr qyzmetteri) bolyp tabylady. 13. JAK-tyń hatshysy «A» korpýsynyń memlekettik ákimshilik laýazymyn atqaratyn ýákiletti organnyń laýazymdy adamy bolyp tabylady. Ekinshi jáne úshinshi deńgeılerdegi attestattaý komıssııalarynyń hatshysy memlekettik organnyń personaldy basqarý qyzmetiniń (kadr qyzmetiniń) ókili bolyp tabylady. 14. Personaldy basqarý qyzmetiniń (kadr qyz­me­tiniń) ókili bolmaǵan jaǵdaıda nemese onyń attes­tattaýdan ótýi kezinde attestattaý komıssııa­sy tóraǵasynyń sheshimimen attestattaý komıs­sııasynyń hatshysy bolyp basqa adam belgilenedi. 15. Attestattaý komıssııasynyń jumysyn uıymdastyrýdy onyń hatshysy qamtamasyz etedi jáne daýys berýge qatysýǵa quqyǵy joq. 16. Ekinshi jáne úshinshi deńgeılerdegi attestattaý komıssııalarynyń quramy osy Qaǵıdalardyń 32 jáne 38-tarmaqtarynda belgilengen tıisti attestattaý komıssııalary tóraǵalarynyń aktilerimen bekitiledi. 17. Attestattaý komıssııasy tóraǵasynyń aktilerdi shyǵarý boıynsha ókilettikteri bolmaǵan jaǵdaıda, attestattaý komıssııasynyń quramyn aktilerge qol qoıýǵa ýákiletti joǵary turǵan laýazymdy adam bekitedi. 18. Attestattaý komıssııalary keminde bes músheden, onyń ishinde tóraǵadan turady. Attes­tattaý komıssııasynyń qatyspaǵan múshelerin almastyrýǵa jol berilmeıdi. 19. Attestattaý komıssııasynyń tóraǵasy dáleldi sebeptermen otyrysqa qatyspaǵan jaǵdaıda, onyń mindetteri attestattaý komıssııasy músheleriniń birine ýaqytsha júkteledi. 20. Attestattaý komıssııasy otyrysynyń, eger oǵan komıssııa quramynyń úshten ekisi qatysqan jaǵdaıda, quqyqtyq kúshi bar dep sanalady. 21. Attestattaý komıssııasynyń sheshimi otyrysqa qatysqan attestattaý komıssııasy músheleriniń jalpy sanynyń kópshilik daýysymen, attestattalatyn «B» korpýsy qyzmetshisiniń qatysýynsyz qabyldanady. Daýystar teń bolǵan jaǵdaıda, attestattaý komıssııasy tóraǵasynyń daýysy sheshýshi bolyp tabylady. 22. Qabyldanǵan sheshim attestattaý komıs­sııa­synyń otyrysynan keıin úsh jumys kúni ishinde hattama túrinde resimdeledi, oǵan attestattaý komıssııasynyń tóraǵasy jáne hatshysy qol qoıady. 23. «B» korpýsynyń qyzmetshisi tıisti attestattaý komıssııasynyń hattamasyna qol qoıylǵan kúninen bastap úsh jumys kúni ishinde oǵan qol qoıyp tanysady. 24. Attestattaý komıssııasynyń sheshimi shyqqannan keıin «B» korpýsy qyzmetshisiniń suratýy boıynsha baǵalaý paraǵynyń, jeke quzyretterdi baǵalaıtyn test nátıjeleri týraly qorytyndynyń kóshirmeleri, attestattaý komıssııasy otyrysynyń hattamasynan úzindi ol suratý jasaǵan kúnnen bastap eki jumys kúni ishinde beriledi. 2. Attestattaýdy ótkizýdiń kezeńderi 25. Attestattaý mynadaı kezeńderdi qamtıdy: 1) baǵalaý paraǵyn daıyndaý; 2) jeke quzyretterdi baǵalaıtyn test ótkizý. Jeke quzyretterdi baǵalaıtyn testke qatyspaǵan «B» korpýsynyń qyzmetshisi kelesi kezeńge jiberilmeıdi; 3) JAK nemese tıisti deńgeıdegi attestattaý komıssııalarynda áńgimelesýden ótý. Áńgimelesý barysy dybys-nemese beınejazba quraldaryn qoldaný arqyly tirkeledi. Ekinshi jáne úshinshi deńgeılerde «B» korpý­synyń qyzmetshilerimen áńgimelesýdi beınekonferensbaılanysy arqyly ótkizýge jol beriledi; 4) áńgimelesýdiń qorytyndysy boıynsha jáne al­dyńǵy kezeńderdiń nátıjeleri eskere oty­ryp, attestattaý komıssııasynyń sheshimder qabyldaýy. 26. Attestattaý komıssııasy myna sheshimderdiń birin qabyldaıdy: 1) atqaratyn memlekettik laýazymyna saı ke­ledi jáne laýazymyn joǵarylatýǵa usynylady; 2) atqaratyn memlekettik laýazymyna saı keledi; 3) atqaratyn memlekettik laýazymyna saı emes jáne memlekettik laýazymyn tómendetýge usynylady; 4) atqaratyn memlekettik laýazymyna saı emes jáne qyzmetten shyǵarýǵa usynylady. 27. Baǵalaý paraǵynyń nysanyn, jeke quzyretterdi baǵalaıtyn test baǵdarlamalary men ony uıymdastyrý tártibin, sondaı-aq áńgimelesýdi ótkizý nusqaýlyǵyn ýákiletti organ aıqyndaıdy. 28. Birinshi deńgeıde attestattaýdy JAK-ta A-1, A-2, A-3, A-4, V-1, S-1, S-O-1, D-1, D-2, D-O-1 sa­­natyndaǵy «B» korpýsynyń qyzmetshileri ótedi. 29. Ekinshi deńgeıde attestattaý komıssııalary: V-2, V-3, V-4, V-5, S-2, S-3, S-4, S-5, S-O-2 sanat­taryndaǵy «B» korpýsynyń qyzmetshileri attestattaýdan ótetin ortalyq memlekettik organdarda; S-3, S-4, S-5, S-O-2 sanattaryndaǵy «B» kor­pý­synyń qyzmetshileri attestattaýdan ótetin orta­lyq memlekettik organdardyń vedomstvolarynda; S-O-3, S-O-4, S-O-5, S-O-6, C-R-1, C-R-2 sanat­taryndaǵy «B» korpýsynyń qyzmetshileri attes­tattaýdan ótetin ortalyq memlekettik or­gan­dardyń jáne olardyń vedomstvolarynyń ob­lys­tardaǵy, respýblıkalyq mańyzy bar qala­daǵy, astanadaǵy aýmaqtyq bólimshelerinde; D-3, D-4, D-5, D-O-2, D-O-3, D-O-4, D-O-5, D-O-6, E-1, E-2, E-R-1 sanattaryndaǵy «B» korpýsynyń qyzmetshileri attes­tattaýdan ótetin oblystardyń, respýblıkalyq mańyzy bar qalanyń, astananyń ákimderi apparattarynda qurylady. 30. Oblystardyń, respýblıkalyq mańyzy bar qalanyń, astananyń ákimderi, máslıhattary, tekserý komıssııalary apparattarynyń, sondaı-aq atqarýshy organdardyń «B» korpýsy qyzmetshilerin attestattaýdy ótkizý úshin biryńǵaı oblystyq/qalalyq attestattaý komıssııalary qurylady. 31. JAK-tyń tóraǵasy Qazaqstan Respýb­lıkasynyń Prezıdenti Ákimshiligi Basshysynyń orynbasary bolyp tabylady. 32. Ekinshi deńgeıdegi attestattaý komıssııa­larynyń tóraǵalary bolyp mynadaı laýazymdy adamdar aıqyndalady: 1) ortalyq memlekettik organnyń attestattaý komıssııasyna – jaýapty hatshy nemese apparat basshysy, jaýapty hatshy nemese apparat basshysy laýazymy engizilmegen memlekettik organdarda – memlekettik organ basshysy aıqyndaıtyn ózge adam; 2) ortalyq memlekettik organ vedomstvosynyń attestattaý komıssııasyna – vedomstvo basshysy; 3) ortalyq memlekettik organnyń oblys­­tardaǵy, respýblıkalyq mańyzy bar qa­la­syndaǵy, astanadaǵy aýmaqtyq bólimshesiniń attestattaý komıssııasyna – aýmaqtyq bólim­sheniń basshysy; 4) vedomstvonyń oblystardaǵy, respýblıkalyq mańyzy bar qalasyndaǵy, astanadaǵy aýmaqtyq bólimshesiniń attestattaý komıssııasyna – vedomstvonyń aýmaqtyq bólimshesiniń basshysy; 5) oblystardyń, respýblıkalyq mańyzy bar qalanyń, astananyń ákimderi, máslıhattary, tekserý komıssııalary apparattarynyń, son­daı-aq atqarýshy organdardyń biryńǵaı oblys­tyq/qalalyq attestattaý komıssııasyna – oblys­tardyń, respýblıkalyq mańyzy bar qalanyń, astananyń ákimderi apparatynyń basshysy. 33. Vedomstvo basshysy, ortalyq memlekettik organnyń oblystardaǵy, respýblıkalyq mańyzy bar qaladaǵy, astanadaǵy aýmaqtyq bólimshesiniń basshysy bolmaǵan nemese attestattaýdyń qorytyndylary boıynsha ol atqaratyn laýazymyna saı emes dep tanylǵan jaǵdaıda, osy memlekettik organnyń attestattaý komıs­sııasynyń tóraǵasy bolyp jaýapty hatshy nemese joǵary turǵan organnyń apparat basshysy nemese olardyń sheshimimen JAK-ta attestattaýdan sátti ótken ózge laýazymdy adam belgilenedi. 34. Ortalyq memlekettik organnyń vedomstvo­synyń oblystaǵy, respýblıkalyq mańyzy bar qaladaǵy, astanadaǵy aýmaqtyq bólimshesiniń basshysy bolmaǵan nemese attestattaýdyń qorytyndylary boıynsha ol atqaratyn laýazymyna saı emes dep tanylǵan jaǵdaıda, osy memlekettik organnyń attestattaý komıs­sııasynyń tóraǵasy bolyp vedomstvo basshysy nemese onyń sheshimimen JAK-ta attestattaýdan sátti ótken ózge laýazymdy adam belgilenedi. 35. Oblystyń, respýblıkalyq mańyzy bar qalanyń, astananyń ákimi apparatynyń basshysy bolmaǵan jaǵdaıda, biryńǵaı attestattaý komıssııasynyń tóraǵasy bolyp JAK-ta attestattaýdan sátti ótken oblystyń, respýblıkalyq mańyzy bar qalanyń, astananyń ákimi apparaty basshysy orynbasarlarynyń biri belgilenedi. 36. Úshinshi deńgeıdegi attestattaý komıssııa­lary: C-R-3, C-R-4, C-R-5 sanattaryndaǵy «B» korpýsynyń qyzmetshileri attestattaýdan ótetin ortalyq memlekettik organdardyń jáne olardyń vedomstvolarynyń aýdandardaǵy, qalanyń aýdan­daryndaǵy jáne oblystyq mańyzy bar qa­lalardaǵy aýmaqtyq bólim­shelerinde qurylady. Osy tarmaqtyń birinshi bóliginde atalǵan «B» korpýsynyń qyzmetshilerine ortalyq memlekettik organdardyń jáne onyń vedomstvolarynyń oblystardaǵy, respýblıkalyq mańyzy bar qaladaǵy, astanadaǵy aýmaqtyq bólimshelerinde qurylatyn attes­tattaý komıssııalarynda attestattaýdan ótýine ruqsat etiledi; E-3, E-4, E-5, E-R-2, E-R-3, E-R-4, E-R-5, E-G-1, E-G-2, E-G-3, E-G-4 sanattaryndaǵy «B» korpýsynyń qyzmetshileri attestattaýdan ótetin aýdandardaǵy, qalanyń aýdandaryndaǵy jáne oblystyq mańyzy bar qalalardaǵy ákimder apparattarynda qurylady. 37. Aýdandar, qaladaǵy aýdandar jáne oblystyq mańyzy bar qalalar ákimderi apparattarynyń, sondaı-aq atqarýshy organdarynyń, aýdan (oblystyq mańyzy bar qala) máslıhattarynyń «B» korpýsy qyzmetshilerin attestattaýdan ótkizý úshin biryńǵaı aýdandyq/qalalyq attestattaý komıssııa­lary qurylady. 38. Úshinshi deńgeıdegi attestattaý komıs­sııalarynyń tóraǵalary bolyp mynadaı laýazymdy adamdar belgilenedi: 1) ortalyq memlekettik organnyń aýdan­dardaǵy, qalanyń aýdandaryndaǵy jáne oblystyq mańyzy bar qalalardaǵy aýmaqtyq bólimshesiniń attestattaý komıssııasyna – aýmaqtyq bólimsheniń basshysy; 2) vedomstvonyń aýdandardaǵy, qalanyń aýdandaryndaǵy jáne oblystyq mańyzy bar qalalardaǵy aýmaqtyq bólimshesiniń attestattaý komıssııasyna – vedomstvonyń aýmaqtyq bólimshesiniń basshysy; 3) aýdan, qaladaǵy aýdan jáne oblystyq mańyzy bar qala ákimi apparatynyń, sondaı-aq aýdan (oblystyq mańyzy bar qala) máslıhatynyń biryńǵaı aýdandyq/qalalyq attestattaý komıssııasyna – oblystyq mańyzy bar qalanyń (oblystyń ákimshilik ortalyǵy bolyp tabylatyn qalanyń ákimin qospaǵanda), oblystaǵy aýdannyń jáne qaladaǵy aýdannyń ákimi; 4) oblystyń ákimshilik ortalyǵy bolyp tabylatyn qalanyń biryńǵaı qalalyq attestattaý komıssııasyna – qala ákimi belgileıtin, attestattaýdan sátti ótken qala ákimi orynbasarynyń biri. 39. Ortalyq memlekettik organnyń jáne onyń vedomstvosynyń aýdandardaǵy, qalanyń aýdandaryndaǵy jáne oblystyq mańyzy bar qalalardaǵy aýmaqtyq bólimshesiniń basshysy bolmaǵan ne ol ekinshi deńgeıdegi attestattaýdan ótpegen jaǵdaıda, attestattaý komıssııasynyń tóraǵasy bolyp joǵary turǵan organnyń basshysy nemese onyń sheshimimen – attestattaýdan sátti ótken ózge laýazymdy adam belgilenedi. 40. Oblystyq mańyzy bar qalanyń, oblystaǵy aýdannyń jáne qaladaǵy aýdannyń ákimi bolmaǵan jaǵdaıda, attestattaý komıssııasynyń tóraǵasy bolyp attestattaýdan sátti ótken aýdan, qaladaǵy aýdannyń jáne oblystyq mańyzy bar qala ákimi orynbasarynyń biri belgilenedi. 3. Attestattaý komıssııasynyń sheshimine shaǵymdaný 41. Attestattaý komıssııasynyń sheshimine Zańnyń 63-baby 8-tarmaǵynda kózdelgen tártipte shaǵym jasaýǵa bolady. 4. Qorytyndy erejeler 42. Personaldy basqarý qyzmeti (kadr qyzmeti) tıisti attes­tattaý komıssııasynyń sheshimin «B» korpýsy qyzmetshisiniń qyzmettik tizimine engizedi.