Áýesqoı boksta úzdikterdiń biri bolǵan Olımpıada chempıony Danııar Eleýsinov birer kún buryn ǵana kásipqoı boksqa aýysqandyǵyn habarlaǵan bolatyn. Aldaǵy ýaqytta ol MJA Entertaynments promoýterlik kompanııasymen kelisimshartqa otyrady. Atalǵan kompanııanyń basshysy Maık Altamýra osy jóninde óziniń pikirimen bólisti. Bul týraly sports.kz habarlady.
MJA Entertaynments jaqynda ǵana qurylǵandyqtan ol jaıly málimetter de az. «Men boks menedjmentine 16 jyl buryn kelgenmin. Kúndiz-túni talmaı jumys istegenimniń arqasynda osy kompanııany quryp otyrmyn. Birinshi orynda Avstralııa jáne Azııa-Tynyq muhıt aımaǵy elderimen baılanysta bolamyz. MJA – Maıkl Djon Altamýra, ıaǵnı meniń tolyq aty-jónim», – dedi ol.
Eleýsinovtiń alǵashqy jekpe-jegi Qytaıda ótetini týraly habarlanǵan bolatyn. «Danııardyń juldyzdy mansabyn qurý úshin Aspanasty eliniń naryǵy mańyzdy ról atqarady. Ol jaqtyń demeýshileri de kóp, sportqa degen qyzyǵýshylyǵy da joǵary. Árıne, biz tek Qytaımen ǵana shektelip qalmaımyz. Olımpıada chempıonyn álemniń barlyq telearnalarynan kórsetýge ýáde beremiz. Sondaı-aq, josparymyzda «Astana Arenada» hedlaın uıymdastyrý bar», – dedi Maıkl.
MJA Entertaynments-ke Danııardyń aǵasy Dáýrenniń de qosylǵanyn ákesi Marat Eleýsinov málimdegen. «Qazir Dáýrenmen kelisimshart jasasýdyń sońǵy kezeńi qaldy. Boıyndaǵy jigeriniń arqasynda álem chempıondyǵyna qol jetkizedi dep úmittenemin. Qazaqstannyń tarıhyna kóz júgirter bolsaq, álemge belgili kóptegen bylǵary qolǵap sheberleri shyqqan. Mundaı talantty jandarmen qyzmettes bolýdyń ózi úlken mártebe», – dedi promoýter.
Qytaı, Avstralııa, Azııa-Tynyq muhıt aımaǵynyń elderi. Osydan kelip, kásipqoı boks órkendegen jerdiń biri AQSh bolǵanmen, atalǵan kompanııa basshysy bul elge asa qatty qyzyǵýshylyq tanytpaıtyn sııaqty. «AQSh-ty jospardan alyp tastaý múmkin emes. Onyń da kezi keletinine senimdimin. Biraq 3-4 jyl burynǵydaı tabysqa jetý qıyndaý. Televızııalyq naryǵy da azdap quldyrap qaldy. Al qazirgi ýaqytta Danııardyń brendin qalyptastyrýdy maqsat etip otyrmyz. Budan soń aýqymdy jumystarǵa kóshemiz», – dedi Altamýra.
«Danııarǵa burynnan kózim túsip júrgen edi. Onyń Zııa Alıev jáne Elvıs Krespo syndy menedjmentterimen aralasyp turatynmyn. Boıyndaǵy talantymen, jeńiske degen qulshynysymen birden nazaryma ilikti. Aldaǵy ýaqytta onymen tyǵyz baılanysta bolatynyma qýanyp júrmin. Al qarapaıymdylyǵy óz aldyna bir áńgime. Danııarǵa kásipqoı boksta alǵa qoıǵan maqsaty týraly suraǵanymda, esh oılanbastan «Aty ańyzǵa aınalǵan tulǵalardyń biri bolǵym keledi» dep jaýap berdi», – dedi ol.