Búgin Astana ákimi Áset Isekeshev Germanııa Federatıvti Respýblıkasynyń tótenshe jáne ókiletti elshisi Rolf Mafaelmen kezdesti, dep habarlaıdy elorda ákimdigi.
Kezdesý barysynda elorda basshysy GFR elshisine ótken jyldyń jeltoqsanynda Berlın qalasynda bolǵan teraktige baılanysty kóńil aıtty.
«Astanalyqtar berlındik dostarynyń qaıǵysyna ortaqtasady, biz terrorızmniń kez-kelgen qubylystaryna ymyrasyz túrde qarsy turýdy árqashan qoldaımyz», - dedi Áset Isekeshev.
Astana ákimi atap kórsetkendeı, Qazaqstan men Germanııany dástúrli dostyq jyly qatynastar baılanystyrady. GFR respýblıkanyń aldynǵy qatarly saýda áriptesteriniń qataryna kiredi, al Berlın Astananyń baýyrlas qalasy jáne áriptesi bolyp tabylady.
Qazaqstan men Germanııa elordalarynyń arasynda túrli salalarda ózara qyzyǵýshylyqqa negizdelgen mazmundy dıalog damyp keledi. Astanada ótetin EKSPO-2017 halyqaralyq mamandandyrylǵan kórmesi qos tarapty baılanystyrýshy mańyzdy býyndardyń biri bolmaq. Germanııa kórme aýmaǵynan alǵashqylardyń biri bolyp pavılon alǵandardyń qatarynda. Osy oraıda Astana ákimi tek kórmede ǵana emes, búkil qala aýmaǵynda da túrli sharalar ótkizý múmkindigin qarastyrýdy usyndy.