QR Prezıdenti Nursultan Nazarbaev Birikken Arab Ámirligine resmı sapary barysynda Ábý-Dabı ámirliginiń taq murageri, BAÁ Qarýly kúshteri Joǵarǵy Bas qolbasshysynyń orynbasary, sheıh Muhammed ben Zaıd Ál Nahaıanmen kezdesti, dep habarlady Aqordanyń baspasóz qyzmeti.
Kezdesý barysynda Qazaqstan Prezıdenti men Ábý-Dabıdiń taq murageri eki eldiń saýda-ekonomıkalyq, ınvestısııalyq, energetıkalyq, mádenı-gýmanıtarlyq salalardaǵy ekijaqty yntymaqtastyq máseleleri týraly aıtty. Sonymen qatar halyqaralyq kúntártibindegi ózekti máselelerdi talqylady.
Keńeıtilgen quramdaǵy kelissózderdiń nátıjesinde birqatar qujatqa qol qoıyldy:
- Qazaqstan Respýblıkasy Úkimeti men Birikken Arab Ámirlikteri Úkimeti arasynda QR-nyń BAÁ-degi jáne BAÁ-niń Qazaqstandaǵy Elshilikteriniń qajettiligi úshin Astana men Ábý-Dabı qalalarynda jer telimderin qaıtarymsyz negizde ózara usyný týraly kelisim;
- Qazaqstan Respýblıkasy Úkimeti men Birikken Arab Ámirlikteri Úkimeti arasynda dıplomatııalyq tólqujatqa ıe azamattardyń ózara vızasyz saparlary týraly kelisimge ózgertýler engizý týraly hattama;
- QR Din isteri jáne azamattyq qoǵam mınıstrligi men Birikken Arab Ámirlikteri Islam isi jáne vakýf jónindegi bas agenttigi arasynda ózara túsinistik týraly memorandým;
- «ASTANA EKSPO-2017» men «EKSPODÝBAI 2020» bıýrosy arasynda ózara túsinistik týraly memorandým;
- Mańǵystaý oblysy ákimdigi men DP World FZE arasynda ózara túsinistik týraly memorandým;
- QR Syrtqy ister mınıstrligi men Birikken Arab Ámirlikteri arasynda konsýldyq máseleler boıynsha birlesken komıssııa qurý týraly ózara túsinistik týraly memorandým;
- QR Investısııalar jáne damý mınıstrligi men Birikken Arab Ámirlikteri Ekonomıka mınıstrligi arasynda týrızm salasyndaǵy ózara túsinistik týraly memorandým;
- QR Investısııalar jáne damý mınıstrligi men BAÁ Jer ústi jáne sý kóligi federaldy agenttigi arasynda halyqaralyq jolaýshylar men júkterdi avtokóliktermen tasymaldaý týraly memorandým rásimdeldi.