Qazir EKSPO-2017 halyqaralyq kórmesi jaqyndaǵan saıyn, úlkenniń de, kishiniń de ol týraly bilsem degen yntyzary mol. Jergilikti fotograf, Qazaqstan jýrnalıster odaǵynyń múshesi Georgıı Shapovalov «EKSPO álemi» atty kórkem fotografııalar kórmesin ashqanda jerlesteriniń osy tilegin qaperge alypty.
G.Shapovalovtyń kóshpeli foto kórmesinde ol daıyndaǵan jıyrmadan astam sýret bar. Onyń barlyǵy da órkenıettiń óskenin bildiretin osynaý halyqaralyq kórmeniń tarıhynan syr shertedi. Kórmeni aldymen Qostanaı qalasyndaǵy Y.Altynsarın atyndaǵy daryndy balalarǵa arnalǵan mektep-ınternattyń oqýshylary tamashalady.
Astanada «Bolashaq energııasy» degen atpen 10 maýsym men 10 qyrkúıek arasynda 100 eldiń qatysýymen ótetin álemdik kórme Qazaqstandy jer júzine tanyta túseri haq. «EKSPO álemi» fotosýret kórmesine ár jyldary, ár zamanda ótken kórmeniń sol ýaqyttyń sımvolyna aınalǵan áıgili tustary tańdalyp alynypty. Eń birinshi Londonda ótken kórme – Gaýhar saraı, Parıjdiń bet beınesindeı Eıfel munarasy, Astana pavılony sekildi EKSPO tamashalaryn kórermen tapjylmaı tamashalaıdy.
Oblystyq tarıhı-ólketaný mýzeıi mamandarynyń bastamasymen uıymdastyrylǵan bul kóshpeli kórmeniń kórermender úshin tanymdyq, aǵartýshylyq ta mańyzy zor boldy.
Názıra JÁRIMBETOVA,
«Egemen Qazaqstan»
QOSTANAI