Ońaı olja opyndyrdy

Sońǵy kezderi ońaı olja­ǵa batýǵa qumarlar qatary kóbeıip barady. Tipti, «bireý­­diń ala jibin attama», «kisi aqy­syn jeme» deıtin úlken­der­diń naqyly aıaq asty bo­lyp qalǵandaı qazir. Kún sa­ıyn «jep qoıypty, obyp ketip­ti» degen habardy estısiń, áı­teýir. «Túıeni túgimen» jut­sa da qaqalmaımyn dep oı­laı­dy-aý deımin olar. Bi­raq, túp­tiń-túbinde eńbeksiz tabys­tyń eńseńdi basatyny anyq. Sóı­tip, ustalyp, qolǵa ki­sen salyn­ǵanda ǵana opyq jep jata­tyn­d­a­ryn qaıtersiń, shirkinderdiń. Muǵaljar aýdandyq soty osyndaı ońaı ojaǵa kenelmek bolǵan «Qandyaǵash Munaı О́nimderi» LTD» JShS-nyń dırektory Aıbat Sýsınovke úkim shyǵardy. 30 jastaǵy kásiporyn basshysy ózine senip tapsyrylǵan bóten múlikti ıemdengeni úshin aıypty bolyp otyr. Sot materıaldarynan belgili bolǵandaı, ol 2015-2016 jyldary 3,3 myń tonna munaı urlaǵan. Dızel otyny men janar-jaǵarmaı munaı qoımasynan «KamAZ» avtokólikterine esh kedergisiz tıelip, shyǵarylyp otyr­ǵan. Kásiporyn basshysy jumysshylaryna urlanǵan «qara altyndy» jýrnalǵa tirkemeý jóninde tapsyrma berip kelipti. Saldarynan kásiporyn quryltaıshysy «QazMunaıGaz ónimderi» JShS-na 445 mıllıon teńge­den astam shyǵyn keltirilgen. Qylmystyq kodekstiń 189-babynyń 4-bóligimen aıyp taǵylǵan seriktestik dırek­tory Aıbat Sýsınovtiń múl­ki tárkilenip, 7 jylǵa sot­tal­dy. Sondaı-aq, ol kom­mer­sııalyq uıymdarda mate­rıal­dyq jaýapkershiligi bar laýa­zym­dardy atqarý quqyǵynan ómir boıyna aıyryldy. «Qasqyrǵa qoı baq­tyr­ǵandaı» dep osyndaıda aıtsa kerek. Satybaldy SÁÝIRBAI, «Egemen Qazaqstan» Aqtóbe oblysy, Muǵaljar aýdany