Aldyńǵy jyly Buqar jyraý aýdanynda bolǵan sý tasqyny zardabynan baspanasyz qalǵan biraz halyqqa jańadan úı salynyp berilgeni belgili. Degenmen, qansha ýáde berilgenimen, áli kúnge úıge qoly jetpegen jandar da bar. Aýdan ákimi Nurken Kópjanov bul másele kóktemge deıin sheshiledi dep otyr. Bul týraly Ortalyq kommýnıkasııalar qyzmetiniń óńirlik bólimshesinde málimdeldi.
Esterińizge sala ketsek, Qaraǵandy oblysynda 2015 jyldyń kókteminde bolǵan sý tasqynynan 35 aýyldyq eldi mekendegi 1760 turǵyn úı zardap shekken bolatyn. Bul tabıǵı zaýaldan, ásirese, osy Buqar jyraý aýdanynyń halqy kóp zardap shekti. Jer-dúnıeni basyp ketken tasqynnyń saldarynan myń jarymdaı otbasy turyp jatqan shańyraǵynan aıyryldy.
– Sol kezde úıler jańadan turǵyzylǵanda olardyń jobasy baspanasyz qalǵan halyqtyń ózimen aqyldasyp jasalǵan bolatyn, – deıdi aýdan ákimi. – 240 úı salyndy. Degenmen, túrli sebeptermen áli kúnge baspana ala almaǵan adamdar bar. Oǵan, bir esepten, ózderi kináli. Bireýleriniń qujattary túgel emes, endi bireýleri úıdi óz atyna resimdemegen. Iesi joq úıdiń ornyna jańadan úı turǵyzyp bersek, biz de zańnan attaǵan bolar edik. Taǵy bir aıtary, erejege sáıkes biz zardap shekken otbasyǵa bir baspanasyn ǵana qalpyna keltirip berýimiz kerek. Al keı adamdarda eki, tipti úsh úıden bolǵan. Osyndaı máseleler boıynsha qazirgi ýaqytta 67 adamnyń 12-siniń ǵana jaǵdaıy sheshilmeı tur. Olardyń da kóbiniń baspanasy bar, dalada júrgen joq. Buǵan deıin úıi bolmaǵandardyń ózine Qaraǵandy oblysynyń sý tasqynynan zardap shekken turǵyndaryna kómek qorynan qarajat bólindi. Bul qor qalypty jumys istep tur, oǵan qarjy tartý jaǵy da eskerilip otyrady. Sý tasqynynan zardap shekken jandardyń problemalary bıylǵy kóktemge deıin tolyǵymen sheshiledi dep oılaımyn.
Aýdan basshysynyń bardy bar, joqty joq dep otyrǵan ashyqtyǵy kóńilge úmit uıalatady. Ol sózinde turyp, endi bir-eki aıdan soń bul másele qaıta qozǵalmaıdy dep senemiz.
Qaırat ÁBILDINOV,
«Egemen Qazaqstan»
QARAǴANDY