Qostanaı óńirinde kóktem shyqqansha «kári quda qystyń» álegi taýsylmaıdy-aq. Qarasý aýdanyndaǵy Ýshakov eldi mekeni oblys ortalyǵynan 200 shaqyrymdaı jerde jatyr. Aýyl negizgi uly joldan 24 shaqyrymda ornalasqan. Jol men aýyldyń arasyn qar kómip, syrtqy dúnıemen baılanys úzilip qalǵan bolatyn. Áıteýir uıaly baılanystyń arqasynda aýyldaǵylar ortalyqpen habarlasyp otyrdy.
Jaqynda osyndaǵy aıaǵy aýyr áıeldiń densaýlyǵy nasharlap, búkil ýshakovtyqtar bir tarynyń qaýyzyna tyǵylǵandaı boldy. Bir-eki shaqyrym emes, baqandaı 24 shaqyrymdy qarǵa ombylap, at ta, arba da júrip óte almaıdy. Bul aýylǵa tek Soltústik óńirlik aeroutqyr jedel-qutqarý jasaǵynyń qutqarýshylary ǵana júrdek kóligimen kire aldy. Jedel dárigerlik kómek kórsetilmese, aıaǵy aýyr ananyń jaǵdaıy tym nasharlap ketetin túri bar eken. Ony qutqarýshylar joldaǵy Áýlıekól aýdandyq aýrýhanasyna jetkizip saldy.
Sol joly aýyl feldsheri ishi aýyratynyn aıtyp, mazalanǵan on jasar er balany da qutqarýshylarǵa aıtqan bolatyn. Feldsher soqyr ishek bolýy múmkin dep dıagnoz qoıǵan balany qutqarýshylar Qostanaı qalasyndaǵy oblystyq balalar aýrýhanasyna ákelip tapsyrdy. Olar qar qursaýyndaǵy aýyldan taǵy da 8 adamdy alyp shyqty. Adamdar ómiri men densaýlyǵyna tóngen qaýip seıildi.
– 24 shaqyrym – óte uzaq jol. Shamaly qar úrip jaýsa joldy kómip tastaıdy. Ony ár qar jaýǵan saıyn tazalap otyrý ońaı emes, kóp qarjyny talap etedi. Sondyqtan Ýshakov aýylynyń jaǵdaıy únemi qutqarýshylar nazarynda bolady, – deıdi SО́AUJQJ bastyǵynyń orynbasary Sergeı Shmıdt.
Qutqarýshylar munyń syrtynda oblys óńirinen ótetin respýblıkalyq mańyzy bar tas joldardyń boıynda kezekshilik jasap, qarǵa keptelip qalǵan jolaýshy kólikteri men adamdardy úsip ketýden saqtap qaldy.
Názıra JÁRIMBETOVA,
«Egemen Qazaqstan»
QOSTANAI