Sońǵy ázirlikter júrip jatyr

13 kún qaldy

2017 jylǵy qysqy Ýnıversıadanyń Atletter aýylynda sport delegasııalaryn qabyldaý nysandarynyń sońǵy ázirlikteri júrip jatyr. «Búgingi kúni qysqy stý­denttik oıyndarǵa qatysatyn 59 eldiń delegasııa ókilderinen úsh myńnan asa ótinim qabyldadyq. Komandalar 24 qańtardan bas­tap keletindikten, dál sol kúni bizde Atletter aýylyn ashý saltanaty ótkiziledi. Qazirgi tańda nysandar 90 paıyzǵa daıyn. Turǵyn úı bloktaryn jabdyqtaý, turmysta qoldanylatyn shaǵyn zattardy tehnıkalyq turǵydan ornalastyrý sııaqty jumystar júrgizilýde», dedi 2017 jyly Almaty qalasynda 28-shi Dúnıejúzilik qysqy Ýnıversıadany daıyndaý jáne ótkizý jónindegi dıreksııasy Atletter aýylyn basqarý departamentiniń basshysy Sánim Sháripova. Atletter aýylynda sportshylarmen qatar, Reseı, Ýkraına, Ońtústik Koreıa, Qytaı, AQSh jáne basqa da elderden keletin júzge jýyq halyqaralyq eriktiler jaıǵasady. Bas josparǵa sáıkes, Atletter aýyly 5000 adamdy syıdyra alady. Pıramıda túrinde salynǵan ákimshilik ǵımaratta ornalasqan Atletter aýylynyń ortalyq qaqpalary osy nysannyń «júregi» sanalady. Munda akkredıtteý ortalyǵy, kóshi-qon qyzmeti, qarjy departamenti, sporttyq aqparat ortalyǵy jáne Bas aqparattyq ortalyq ornalasqan. Ýnıversıada qatysýshylary aqparattyq ortalyqtarda jarystardyń kestesi, sporttyq nysandarǵa deıin júretin avtobýs qozǵa­lysynyń kestesinen bastap, Atletter aýylynda, qalada kún saıyn ótkiziletin mádenı baǵdarlamalar sııaqty barlyq qajetti aqparatty ala alady. Almatydaǵy qysqy Ýnı­versıada aıaqtalǵan soń Atletter aýyly Ýnıversıada murasy retinde turǵyn úı keshenine aınalady. Mıra BAIBEK, «Egemen Qazaqstan» ALMATY