«Astana Opera» balettik trýppasy jańa Gala-balet baǵdarlamasyn daıyndaýda, dep habarlady teatrdyń baspasóz qyzmeti.
Elordalyq teatrdyń jarqyraǵan ártister quramy, sonymen qatar ýkraındyq jáne belarýsııalyq teatrlardan shaqyrylǵan solıster - Ellına Pohodnyh jáne Konstantın Geronık 25 qańtarda «Astana Opera» teatrynyń Úlken zalynda óner kórsetedi. Balettik trýppanyń kórkemdik jetekshisi, Reseıdiń halyq ártisi Altynaı Asylmuratova kórermendi qyzyqty oılarymen qýantpaqshy. Kórermenge M. Petıpa men A. Vaganovanyń eń úzdik horeografııalyq týyndylary usynylady. Zamanaýı qoıylymdardyń áýesqoılary R. Petı, S. Mıkel jáne K. Zverevanyń shyǵarmashylyǵyn tamashalaıdy.
Esterińizge sala ketsek, solıster arnaıy júldelerdiń ıegerleri atanǵan - «Astana Opera» teatrynyń sahnasynda ótetin Gala konsertte óner kórsetýge quqyq beretin sertıfıkattarǵa ıe bolǵan.