О́skemenniń qalalyq máslıhat otyrysynda depýtattar men tasymaldaýshylar qoǵamdyq kóliktegi jolaqy qunyn bekitti. Endi aqpan aıynan bastap, О́skemendegi avtobýstardyń jolaqy baǵasy burynǵydaı 75 teńge emes, 90 teńge bolady, dep habarlaıdy QazAqparat.
Qala ákiminiń orynbasary Arman Ysqaqovtyń aıtýynsha, Uly Otan soǵysynyń ardagerlerine, konslager tutqyndary, tyl eńbekkerleri, kópbalaly analarǵa, «Altyn alqa» ıegerlerine, kóz janary boıynsha múgedekter jáne azamattardyń ózge de sanattaryna arnalǵan jeńildikter qalady. 70 jastan asqan zeınetkerler úshin jolaqy quny 50 teńge, mektep oqýshylaryna - 45 teńge dep belgilenip otyr. Al stýdentterge jolaqy bıletteri 50 paıyzdyq jeńildikpen satylady.
Jolaqynyń kóterilýine janar-jaǵarmaı men qosalqy bólshekterdiń qymbattaýy sebep bolyp otyr. Qalalyq avtoparkterde júrgizýshiler tapshy. Sondaı-aq, qoǵamdyq kólikterdiń 70%-y - eskirgen. Bul talqylaýlar bir aıdan astam ýaqyt jalǵasty jáne taraptardyń múddelerin qorǵaýda úlken kelispeýshilikter oryn alǵan da bolatyn. Degenmen depýtattar men tasymaldaýshylar bir ymyraǵa keldi. Ysqaqovtyń málim etkenindeı, bul tarıf tasymaldaýshylardyń barlyq shyǵyndaryn toltyrýǵa jetedi. Avtoparkti jańartý máselesi arnaıy baǵdarlama arqyly sheshilýi yqtımal. Sonymen qatar, onyń aıtýynsha, tasymaldaýshylardyń qyzmet sapasy birshama artýy tıis.