Shókimdeı jándiktiń tastan qashala jasalyp, quddy taý ispetti tabıǵattyń bir jaratylysyndaı bolyp melshıe qalǵan alyp beınesin kórgende, tamsanbasqa áddińiz qalmaıdy. Alǵashynda tabıǵattyń jaratylysy bolar dep kelte qaıyra salarsyz. Sosyn, qyzyl mármár tastardan basy, aıaǵy, quıryǵy, tipti denesiniń ár múshesi somdalǵan beınelerge zer sala qarap turyp yqylym zamandardaǵy adam qolynyń izin ańǵarǵandaı da bolasyz. Sebebi, Shartas dep atalatyn taý qoınaýynda bıiktigi atty adamnan asatyn músinder júzdep sanalady.Tabıǵat-Ananyń ashylmaǵan bul qupııalary Raıymbek aýdanynyń Sarybastaý jáne Súmbe aýyldarynyń arasynda tabıǵatpen bite qaınasyp tur.
Rasynda adam qozǵalta almaıtyn qoı tastardan qııýlastyra quralǵan jándikter beınesi neni ańǵartady? Jalpy, Jer shary sekildi dóńgelek bolyp keletindikten Shartas atalatyny bir oıdy qozǵasa, ár qyryna úńilgen saıyn bir syry sýyrtpaqtalady. Negizi teńiz deńgeıinen eki myń metr bıiktikte jatqan osy óńirde búginde tasbaqa sekildi jándikter joq. Sonda bul qaı zamannyń belgisi bolǵany?
Taǵy bir aıta keter jaıt – Keńes dáýirinde geolog ǵalymdar arnaıy ekspedısııa jasaqtap kelip, zertteý jumystaryn júrgizip, mármár tastardyń jer betinde kúnge qaqtalǵanyn jaramsyz, al jer astyndaǵylaryn qazyp alyp paıdalanýǵa bolady degen uıǵarym jasaǵan eken. Sonda jergilikti halyq ǵasyrlar boıy ózindik qupııasyn búrkep, qasıetin saqtap jatqan Shartastyń kıesi kimdi urar eken dep ishteı tynǵan. Taǵy bir jyldary osy qyzyl mármár tastardy alypsatarlar tasyp áketip, qulpytas bıznesin dóńgeletpek te bolǵan. Biraq ol qııanattan da qudaı saqtady. Qazirgi kezde sarybastaýlyq jastar otaý qurǵanda serýendep Shartasqa baryp estelik sýretke túsý ádetke aınalǵan. Eger zańnama sheńberinde el týrızmin damytýdyń bir joly retinde Shartas tanylsa birqatar múmkindikter joly ashylatyn edi.
Nurbol ÁLDIBAEV,
«Egemen Qazaqstan»
Almaty oblysy,
Raıymbek aýdany
Sýretterdi túsirgen
Baqyt ULDARBEKOV