Qazaqstan namysyn Qysqy Ýnıversıada-2017 oıyndarynda qorǵaıtyn mánerlep syrǵanaýshy Veronıka Sheveleva jaýapkershiligi joǵary jarystar aldyndaǵy kóńil-kúıimen bólisip, óziniń baǵdarlamasy jóninde aıtyp berdi.
– Ýnıversıadaǵa qatysatynymdy estigende, qatty qýanyp kettim. Osyndaı deńgeıdegi jarystarǵa qatysý – úlken qurmet. О́zime senimdi júrmin, biletinimniń bárin kórsete alamyn dep oılaımyn. Qazir biz kóptep jattyǵyp, muz aıdynynda kóbirek ýaqyt ótkizýge tyrysyp júrmiz. Tamasha kóńil-kúıdemin.
– Nege mánerlep syrǵanaýmen shuǵyldanamyn dep sheshtińiz?
– Anam ózi kezinde mánerlep syrǵanaýshy bolǵysy kelgen, biraq ol armanyna jete almady. Sondyqtan meni mánerlep syrǵanaýǵa ákeldi. Birinshi ret jattyǵýǵa baryp, odan shyqqan soń, endi munda eshqashan kelmeımin dep ózime aıtqanym esimde. Biraq, osy kúnge sheıin osy sport túrimen aınalysyp júrmin, qazir shamamen on jyl bolyp qaldy.
– Ýnıversıada ótkiziletin alańda oıyn kórsetkenińiz sizge basymdyq bere me, qalaı oılaısyz?
– Menińshe, bul úlken basymdyq bolmaq. «Almaty-Arenanyń» muz aıdyny óte jaqsy, bizdiń basqa alańdarymyzǵa qaraǵanda áldeqaıda jaqsy. Qazaqstan chempıonatynda osynda syrǵanaǵan maǵan qatty unady, ondaǵy jaǵdaı men orta erekshe.
– Ýnıversıadada kórsetetin baǵdarlamalaryńyzdy anyqtap qoıdyńyz ba?
– «Gorod 312» tobynyń «Ostanýs» ánimen qysqa baǵdarlamany kórsetemin. Maǵan bul án tym qatty unap ketti. Baǵdarlamalardy kórsetý kezinde sózi bar ándi qoldanýǵa ruqsat bergende, ony tańdap kóreıin dep sheshtim. Basynda orys tilindegi ándi alǵan durys pa dep kúmándandym, biraq keıin kóbisi sondaı ánderdi tańdaı bastady. Nátıjesinde Qazaqstan chempıonatynda kórsetken baǵdarlamam barlyǵyna unady. Al erkin baǵdarlamamen áli jumys jasap jatyrmyn.
Ýnıversıadada mánerlep syrǵanaý jarystarynda Qazaqstan namysyn Veronıka Shevelevamen qatar, Denıs Ten, Abzal Raqymǵalıev, Artýr Panıhın, Aıza Imanbek jáne Jansaıa Adyhanova qorǵamaq.
Áńgimelesken
Talǵat RAIYMBEK,
«Egemen Qazaqstan»