Byltyr Alataýdyń baýraıynda shańǵydan Qazaqstan Kýbogy sarapqa salynǵan jarys ótip, bir jaǵynan, stýdentterdiń dúnıejúzilik qysqy Ýnıversıadasyna qatysatyn ulttyq quramanyń saıdyń tasyndaı músheleri irikteldi. Onyń sapynda jaqsy óner kórsetken soltústikqazaqstandyq Rınat Mýhınge úlken senim artylyp, el namysyn qorǵaıtyn boldy.
Jas óren mektepte oqyp júrgende bapkerlerdiń nazaryna iligip, olımpııalyq rezervter daıyndaý ortalyǵyna qabyldandy. Sodan beri sheberligi shyńdalyp, ózin jaqsy qyrynan tanytyp úlgerdi. Ulttyq quramaǵa alynǵaly halyqaralyq jarystarda top jarmasa da, alar asýy, baǵyndyrar bıigi alda ekenin ańǵartty. Búginde onyń esimi sportsúıer qaýymǵa jaqsy tanys. 2013 jyly Rıdder qalasynda jasóspirimder arasynda ótken el birinshiliginde 15 shaqyrymdyq qashyqtyqta birinshi kelip, sport sheberi normatıvin oryndady. Birneshe márte jastar birinshiliginiń jeńimpazy atandy. Onyń esinde 2014 jyly Germanııada uıymdastyrylǵan Eýropa chempıonaty uzaq saqtalady. Mundaı baıraqty básekege tuńǵysh ret qatysqanyna qaramastan 10 shaqyrym boıynsha sóre syzyǵyn úshinshi bolyp qıdy. Shańǵy sporty halyqaralyq federasııasy aıasynda ótken jastar arasyndaǵy álem chempıonatynda onynshy orynǵa taban tirep, álemniń 36 eliniń namysyn qorǵaǵan bir myńǵa tarta shańǵyshylar arasynan qazaqstandyq shańǵyshylardyń eń úzdigi boldy. Aldyńǵy úsh oryndy bólisken germanııalyq Florıan Nots, norvegııalyq Sımen Krıýger, fransýzdyq Adrıen Bakshneınermen sórege quıryq tistese keldi. Almatydaǵy bul chempıonatta kileń myqty sportshylardyń basy qosylǵanyn eskersek, oǵan qatysý– men úshin úlken mártebe. О́zim kórsetken nátıjege kóńilim toldy. Eń bastysy, mol tájirıbe jınaqtadym, deıdi ótken kúnderdi eske alǵan Rınat.
Jyl ótken saıyn Rınattyń tájirıbesi tolysyp, sheberligi shyńdalyp keledi. Nebir azýly qarsylastarmen tereze teńestiretin dárejege jetti. 2016 jyly qysqy Olımpıada oıyndarynyń kúmis júldegeri Vladımır Sahnovqa arnalǵan «Aq marafon» dodasynda 220-dan astam úmitker baq synady. 50 shaqyrymdyq qashyqtyqta Rınat sóre syzyǵyn birinshi qıyp,
2013 jylǵy álem chempıonatynyń qola júldegeri Nıkolaı Chebotkony qapy qaldyrdy. Osylaısha onyń aldynda ketken esesin qaıtaryp, úzdikter qataryna qosyldy. Shvesııanyń Falýn qalasynda ótken álem chempıonatynda aǵaıyndy Chebotkolardan taǵy da qara úzdi. Iýhan Ýlsson, Morıs Manıfıka, Anders Gleersen sekildi azýyn aıǵa bilegen kileń júıriktermen kúsh synasty.
Teriskeıde jurtshylyq jappaı aınalysatyn qysqy sport túrleriniń biri–shańǵy tebý. Sońǵy kezderi Rınatqa elikteýshiler, izin qýýshylar qarasy kóbeıip keledi. Onyń jattyqtyrýshysy Sergeı Permınnyń aıtýyna qaraǵanda, elimizdiń úzdik shańǵyshysy qazir naǵyz babynda.
О́mir ESQALI,
«Egemen Qazaqstan»
Soltústik Qazaqstan oblysy