Elimizdiń kásiporyndary jylqynyń qurǵaq sútin Máskeýge eksporttaıdy, dep habarlaıdy palata.kz.
Basty eksportshy «Evrazııa ınvest» JShS alǵashqy taýardy aqpan aıynda jetkizýdi josparlap otyr. Bastapqyda Reseı astanasyna aı saıyn jarty tonna qurǵaq qymyz jetkizilse, jyl aıaǵyna taman bul kórsetkishti 1 tonnaǵa deıin jetý kózdelgen.
Kásiporyn dırektorynyń orynbasary Ǵalymjan Meırambekov aıtýynsha, qymyzdy Qytaı men Eýropaǵa eksporttaý boıynsha kelissózder júrgizilip jatyr.
«Qytaıda birneshe kompanııa qyzyǵýshylyq tanytyp otyr, alaıda bizdi sertıfıkasııa tusap tur. Aýyl sharýashylyǵy mınıstrligimen birge bul baǵyttaǵy jumystardy atqaryp jatyrmyz. Al Eýropada osy tektes qurǵaq sút ónimin 30-ǵa tarta kompanııa shyǵarady, ıaǵnı osynda naryq daıyn tur. Biz Germanııadaǵy zerthanaǵa ónimdi teksertken edik, keıbir kórsetkishter boıynsha elimizdiń súti eýropalyq ónimnen asyp tústi. О́ıtkeni, bizdiń jylqylar jaıylymǵa shyǵarylyp, qunarly shóppen qorektenedi», – deıdi Ǵalymjan Meırambekov.
Onyń sózinshe, eýropalyqtar jylqy sútin kosmetıka salasynda keńinen paıdalanyp keledi. Osyǵan baılanysty, kásiporyn kosmetıka óndirýdi de josparlap otyr.
2014 jyly Qaraǵandy oblysynyń Osakarov aýdanynda jalpy quny 800 mln teńgeden asatyn, bıe sútinen qurǵaq untaq jasaý óndirisiniń jobasyn júzege asyrý bastalǵan edi. «Evrazııa Invest Ltd» JShS-niń jobasy ishinara «QazAgroQarjy» AQ-nyń nesıelik jelisimen qarjylandyryldy.