2016 jyly óńirdegi jumyssyzdyqtyń aldyn alý úshin jasalǵan halyqty Jumyspen qamtý boıynsha keshendi jospardyń nátıjesinde 29 454 aqtóbelik jumysqa ornalasty. Bul týraly Aqtóbe oblysynyń jumyspen qamtý jáne áleýmettik baǵdarlamalar basqarmasynyń basshysy Qaırat Otarov oblys ákimi Berdibek Saparbaevtyń aldynda mekemeniń 2016 jyly atqarǵan jumystary týraly esep berý barysynda aıtty, dep habarlady strategy2050.kz.
«Jalpy alǵanda, 2016 jyldyń qorytyndysy jaqsy. Áleýmettik mindetter tolyq kólemde oryndalǵan. Eńbekaqy, zeınetaqy, járdemaqy, ózge de áleýmettik tólemder boıynsha qaryzdar joq. 2016 jyly aýyldaǵy jumyspen qamtý deńgeıin qoldaý jáne ósirý úshin 4,1 mlrd. teńge bólindi. Aǵymdaǵy jyly jumyssyzdyqpen kúresý úshin taǵy biraz qarajat bólinbek. Tıimdi nátıjelerge qol jetkizý úshin ýákiletti organdar tarapynan únemi esepke alyp, taldaý jasap, qatań baqylaýda ustaý kerek», - dedi Berdibek Saparbaev.
Aýyl turǵyndarynyń jumyspen qamtylýyn ári qaraı damytý maqsatynda oblys ákimi óńirde «Jumyspen qamtýdyń jol kartasy - 2020» baǵdarlamasynyń úshinshi baǵytyn júzege asyrýda ekonomıkalyq áleýeti tómen aýyl turǵyndaryn áleýeti joǵary eldi mekenderge kóshirýdi tapsyrdy.
О́ńir basshysynyń tapsyrmasymen 2017 jyly oblysta «О́rleý» shartty aqshalaı kómek jobasy belsendi júzege asyrylmaq. Atalmysh joba, 100 naqty qadam – ult jospary aıasynda, 2015 jyldyń ekinshi jartysynda Aqtóbe qalasynda, Mártók jáne Muǵaljar aýdandarynda pılottyq tártipte engizilgen bolatyn. 2016 jyldyń sońyna qaraı jobany engizý aýmaǵy oblys boıynsha 100%-ǵa jetti. Joba kúnkóris kirisi 60%-dan tómen az qamtylǵan otbasylarǵa shartty aqshalaı kómek kórsetýdi qarastyrady. Bul rette olar áleýmettik kelisim-shartqa qol qoıyp, jumyspen qamtý sharalaryna belsendi qatysýy tıis.
Jumyspen qamtý jáne áleýmettik baǵdarlamalar basqarmasy basshysynyń aıtýynsha, atalmysh jobaǵa qatysýdyń nátıjesinde kómek alýshylardyń jan basyna shaqqandaǵy kirisi úsh esege kóbeıdi.