Otandyq kınematografty qorǵaý kerek. Sebebi amerıkalyq fılmderdiń, sondaı-aq kórshi elderdiń kınoekspansııasy qatty. Bul týraly búgin QR Úkimet otyrysynda «Qazaq handyǵy. Almas qylysh» fılminiń rejısseri Rústem Ábdirash málimdedi. "Basqa memleketter oǵan tótep berip, zańdy túrde óz naryǵyn qorǵap otyr. Bizge de óz múddemizdi, óz tarıhymyzdy, óz mádenıetimiz ben tilimizdi qorǵaıtyn ýaqyt keldi", dedi rejısser.
Onyń oıynsha, kınoteatrlarda otandyq fılmderdi kórsetý ýaqytyn zańmen bekitip qoıǵan durys. Áıtpese, búginde ondaı jerlerde qazaqtyń kınosyn yńǵaısyz ýaqytqa qoıyp otyrady eken.
«Ondaı problema burynnan beri bar. Maǵan da Aqtaý, Atyraý, Aqtóbe jaqtan osy másele boıynsha habarlasqandar boldy. Biz dıstrıbıýtorǵa qońyraý shaldyq. Biraq olardyń aıtýynsha, fılmniń ýaqytyn kınoteatrlardyń ózderi qoıady. Bul másele zańmen rettelmegen. Bir ǵana talap bar, bes adam bılet satyp alsa, olar mindetti túrde sol kınoseansqa kirýi tıis. Biraq ýaqytyn kınoteatr belgileıdi. Degenmen, dál osy problemany zańmen bekitip alǵan jón. Sol kezde kınoteatrlardan fılmniń ýaqytyn talap etýge bolady", deıdi Rústem Ábdirash.