Qalyńdyǵy qylyshtyń qyryndaı juqa bolsa da, balalardyń tanym-túsinigin arttyrýǵa taptyrmaıtyn bir dúnıe qolymyzǵa tústi. Jýyrda «Ana tilim – altyn qazynam» jobasynyń aıasynda jetkinshekterge arnalǵan tanymdyq jeti kitapsha jaryqqa shyqty.
Juqa bolsa da, júgi jeńil demes edik. Ortaq bir qaptamaǵa salynǵan jeti kitapshada jeti túrli taqyrypqa qatysty san qıly ataýlar toptastyrylǵan. Sózdik qory sheteldik «mýltıkter» arqyly «baıyp» jatqan baldyrǵandarǵa ulttyq tanym-túsinigimizge qatysty túrli ataýlar usynylyp, árbir ataýǵa qazaq, orys jáne aǵylshyn tilderinde qysqa-nusqa anyqtama berilgen. Ár ataý tilge jeńil taqpaqtarmen, jańyltpash, jumbaqtar arqyly sýrettelip, túrli-tústi ásem fotosýrettermen bezendirilipti.
«Qazyna» baspasynyń baldyrǵandarǵa usynǵan qazynasyna toptastyrylǵan kitapshalar «Janýarlar», «Qustar», «Balyqtar», «Jándikter», «Aǵashtar», «Týystar», «Meniń denem» dep atalady. Árqaısysynda balalar túgili, eresekterdiń ózi bile bermeıtin derekter jeterlik.
Máselen, ózimiz túlkini bilsek te, onyń tóli jaýtań ekenin, analyǵy jáýtik dep atalatynyn osy kitapshany paraqtap otyryp bildik.
Elikke qatysty málimet:
Qalqıǵan qos qulaqty,
Teńbil túri kórikti.
Meken jeri bulaqty,
Bilemisiń... (Elikti), – degen shaǵyn taqpaq ári jumbaqpen berilgen.
«Týystar» degen kitapshadan eń qajetti degen qyryqqa tarta týystyq ataýlardy túgendep shyqtyq. Elimizdiń túkpir-túkpirinde ósetin aǵashtardyń túr-túri taǵy bir kitapshaǵa toptastyrylǵan.
Erekshe berik bolady,
Emennen bolsa bosaǵań.
Elimizde bar emes –
Bir myń jyldaı jasaǵan, – degen qarapaıym tórt jolda da tárbıelik mán jatqandaı.
Sórelerde balalarǵa arnalǵan kitaptar bolǵanymen, kóbisine kóńil tolmaıdy. Orys nemese aǵylshyn tilinen aýdarylǵan taqpaqtar, ertegiler. Sońǵy jyldary osy olqylyqtyń ornyn toltyrýǵa qadam jasalyp, balǵyn oqyrmandardyń tanymyn keńeıtetin, talǵamyn arttyratyn dúnıelerdiń kóbeıip kele jatqany kóńil qýantady. «Qazynanyń» balalarǵa arnalǵan bazarlyǵy da osyndaı paıdaly dúnıe bolady dep úmittenemiz.
Arnur ASQAR,
«Egemen Qazaqstan»