Almatynyń aldynda qysqy Ýnıversıada oıyndaryn Slovakııa eli qabyldaǵany belgili. Al Almatydaǵy jarystarǵa keletin bul eldiń sporttyq delegasııasynyń quramynda 63 adam bar.
Slovakııa da stýdenttik saıystaǵy kil myqtylaryn anyqtaý úshin qysqy sport túrlerinen talaı jarys ótkizgen. Ádette Slovakııa sportshylary hokkeı, mánerlep syrǵanaý, bıatlon, snoýbord, taý-shańǵysy sporty jáne shańǵy jarystarynan myqty bolyp keledi. Eldegi sporttyq ınfraqurylymnyń jaqsy damýy da buǵan úlken yqpal jasap otyr. Sonymen Slovakııa sportshylary taý shańǵysy sporty men hokkeıden júlde alýdan dámeli.
Eske sala ketsek, Slovakııa 2015 jylǵy 27-shi qysqy Ýnıversıadany óz jerinde qabyldaǵan bolatyn. Sol kezde FISU (Halyqaralyq stýdenttik sport federasııasy) sheshimi boıynsha soltústik baǵdarlama jáne bıatlon boıynsha jarystar Slovakııanyń Shtrbske-Pleso jáne Osrble qalalaryndaǵy qysqy sport túrlerine arnalǵan ortalyqtarda ótkizildi.
Slovakııa sportshylary hokkeı jáne taý shańǵysy sportynda júldeli oryndar úshin kúresýdi kózdep otyr. Osy eldiń delegasııasy favorıtter qatarynda shańǵyshy Mateı Falatanyń esimin ataıdy. Mateı Falata 2015 jylǵy qysqy Ýnıversıadanyń qola júldegeri.
Sondaı-aq, Qazaqstan jankúıerlerine Slovakııa quramasynyń hokkeıshisi Mıhaıl Pıhnarchıktiń esimi de jaqsy tanys. Qazirgi tańda ol Pavlodardyń «Ertis» hokkeı klýbynyń qorǵaýshysy retinde óner kórsetip júr. Alda kele jatqan Ýnıversıadada ol Slovakııa quramasynyń sapynda oınaıtyn bolady.
Aınash ESALI,
«Egemen Qazaqstan»
ALMATY