Mańǵystaýda kókpar oıynyn damytýdyń qolǵa alynǵanyna kóp bolǵan joq. Nebary 3 jyldan astam ýaqyt ishinde óńir kókparshylary jaqsy jetistikterge qol jetkizip úlgerdi, olar el chempıonatynda úzdik úshtikke endi. Olardyń arasynan 4 kókparshy EKSPO-2017 kórmesinde ótetin halyqaralyq týrnırge qatysyp, ulttyq ónerdi álem elderi aldynda tanytý úshin qyzý daıyndyq ústinde.
Mańǵystaýda osydan 3 jyl buryn qurylǵan oblystyq ulttyq sport túrleri klýbynda kókpardan basqa báıge, aýdaryspaq, teńge ilý, jamby atý, qyz qýý, qusbegilik, saıatshylyq sekildi ulttyq sport túrlerin damytý qolǵa alynǵan. Aýyl balalaryn sportqa baýlý jáne ulttyq sport túrlerin kóterý maqsatynda qurylǵan klýbqa tartylǵan 240 balaǵa 14 jattyqtyrýshy tálim beredi. Munda balalar atqa minip úırenip, at baptaýdyń qyr-syryna qanyǵady.
EKSPO-2017 kórmesinen soń Mańǵystaýda ulttyq sport klýbynyń aıasy keńeıtilip, barlyq ulttyq sport túrlerin qamtıtyn ortalyq ashý jobasy jasalýda.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy