Keshe Prezıdent janyndaǵy Memlekettik basqarý akademııasy men Italııanyń Qazaqstandaǵy elshiligi jáne «LATTANZIO Group» konsaltıngtik kompanııasy birlesip, «II Buon Governo» (Tıimdi úkimet) grantyn alý úshin Qazaqstan jastary arasynda elimizde júrgizilip jatqan qazirgi reformalarǵa arnalǵan úzdik zertteý jumystaryn jazýǵa konkýrs ótkiziletindigin jarııa etti.
Atalǵan grant jastardyń izdenisin yntalandyryp, jaqsy nátıjelerge qol jetkizýge muryndyq bolmaq. Ásirese, «100 naqty qadam» – Ult josparynyń 1 jáne 5-qadamdaryn is júzine asyrýǵa múmkindik beretini ataldy. Bas grant: aıyna 800 eýro tólenetin 6 aılyq zertteý jumystary, sonyń ishinde bir aıyn Italııanyń úzdik saraptamalyq-taldaý ortalyǵynda ótkizý kózdelse, onyń qarjylandyrylýyn «LATTANZIO Group» kompanııasy óz moınyna alady. Usynylǵan jumystar arasynan 6 úzdik dep tanylǵandary ǵana tańdalyp alynatyndyǵyn aıta ketken jón.
Prezıdent janyndaǵy Raqymshylyq máseleleri jónindegi komıssııanyń tóraıymy Zınaıda Fedotova óz sózinde memlekettik qyzmetke jańa talantty jastardy tartý máselesi ótkir turǵandyǵyn sóz ete kelip, jeke sektorlarda jáne shet elderdegi uıymdarda jumys isteıtin elimizdiń jas azamattaryn keńinen tartý kerektigine nazar aýdartty. Keıbir qyzmetterge sheteldik menedjerler tartylýy múmkindigi de atalmaı qalǵan joq. Sondyqtan da jas ǵalymdarǵa qazirgi memlekettik basqarý júıesindegi tıimdilikti zertteýde kóptegen baǵyttar barlyǵy da qaperge salyndy.
Akademııanyń oqý jumysy jáne aqparattyq tehnologııalar jónindegi vıse-rektory Altaır Ahmetov qazaqstandyq jastardy atalǵan jobaǵa belsendi qatysýǵa shaqyrdy. Bul memlekettik apparatty jetildirip, sonyń arqasynda elimizdi damytýda aıryqsha mańyzdy ekendigin alǵa tartty.
Osyndaı baıqaýlardyń sońǵy jyldary Italııada ótkizilip kele jatqandyǵyn tilge tıek ete ketken «LATTANZIO Group» kompanııasynyń basshysy Bazılıo Býffonı Qazaqstanda grantqa konkýrs ótkizý birinshi ret ekendigin jáne kelesi jyldarda ony jalǵastyrýǵa múmkindik baryn jetkizdi. Taǵy bir belgilisi, álemniń kóptegen elderimen jáne halyqaralyq uıymdarmen tyǵyz baılanystar ornatqan kompanııa Ortalyq Azııa elderimen yntymaqtastyqqa yntaly ekendikterin ańǵartyp otyr. Sondyqtan da Qazaqstanda óz ofısterin ashýdy kózdeıdi.
Vıse-rektor Altaır Ahmetov sóz reti kelgende sheshim qabyldaýǵa azamattardy keńinen jumyldyrý jaǵyn aıta kelip, bilim ordasynyń saraptamalyq-taldaý ortalyǵy retinde izdenýshi jastardyń jańa ıdeıalaryn júzege asyrý jáne grant berý jolymen jas ǵalymdardyń áleýetin arttyrý arqyly memlekettik organdardy jańa bastamalarmen, usynystarmen jáne ǵylymı jobalarmen jabdyqtap otyrý kózdelgendigin alǵa tartty. Italııanyń Qazaqstandaǵy Tótenshe jáne ókiletti elshisi Stefano Ravanıan da óz elindegi osydan jıyrma jyl buryn ótkizilgen reformalardyń barysynan habardar ete ketti. Usynylǵan jumystar arasynan 6 úzdik jumys tańdalyp alynady dep kútilýde.
Tańdap alynatyn jumystar ústimizdegi jyldyń 20 naýryzynda ótetin saltanatty rásim kezinde tanystyrylatyn bolady.
Asqar TURAPBAIULY,
«Egemen Qazaqstan»