Parlament Májilisiniń Tóraǵasy Nurlan Nyǵmatýlınniń tóraǵalyǵymen palatanyń jańa jyldaǵy alǵashqy bıýro otyrysy ótti, dep habarlady Májilistiń baspasóz qyzmeti.
Kún tártibin naqtylaǵan depýtattar aldaǵy jalpy otyrysta jergilikti ózin ózi basqarýdy damytý máselelerine qatysty zań jobasyn birinshi oqylymda qaraýdy josparlap otyr. Sondaı-aq, osy kúni Qazaqstan Úkimeti men IýNESKO arasyndaǵy Qazaqstanda Ortalyq Azııa óńirlik glıasıologııalyq ortalyǵyn qurý (2-sanat) týraly kelisimdi ratıfıkasııalaý týraly zań jobasy qaralady dep kútilýde.
Jalpy otyrysta «Standarttaý týraly» jáne oǵan ilespe zań jobalary jumysqa qabyldanatyn bolady.
Sonymen birge, birqatar zań jobalary boıynsha, atap aıtatyn bolsaq, Halyqaralyq Qaıta Qurý jáne Damý Bankimen Qaryz týraly kelisimdi (Áleýmettik medısınalyq saqtandyrý jobasy), Islam Yntymaqtastyǵy Uıymyna múshe elder arasyndaǵy ekonomıkalyq, tehnıkalyq jáne saýda yntymaqtastyǵy týraly bas kelisimdi ratıfıkasııalaý boıynsha qorytyndy ázirleý merzimi taǵaıyndalmaq.
Bıýro otyrysynda, sondaı-aq, halyqty tegin medısınalyq kómektiń kepildik berilgen kólemi sheńberinde dárilik zattarmen qamtamasyz etý týraly jáne farmasevtıka salasynyń jaı-kúıi men damýy týraly parlamenttik tyńdaý ótkizý týraly qaýly qabyldandy.