Qazaqstanda «halal» ónimdi rastaıtyn ulttyq júıe ázirlenip jatyr. QR Investısııalar jáne damý mınıstrligi metrologııa men tehnıkalyq retteý komıtetiniń tóraǵasy Birjan Kaneshovtiń aıtýynsha, atalǵan júıeni ázirleýge malaızııalyq sarapshylar kómektesedi, dep habarlaıdy QazAqparat.
«Búginde elimizde «halal» markasymen shyǵarylatyn ónimder kóp. Alaıda sonyń barlyǵyn bir-eki standartpen rettep otyrý qıyn. Jalpy, ónim sapasynyń bul baǵyty zańmen tolyǵymen rettelmeı keledi. Sonyń nátıjesinde «halal» brendine múldem sáıkes kelmeıtin ónimder shyǵarylady», - deıdi Kaneshov.
Onyń aıtýynsha, osy saladaǵy jumysty retke keltirý úshin bir-aq sharýanyń basyn qaıyrý qajet. Atap aıtqanda, IFOM (Organıkalyq aýyl sharýashylyǵy úshin qozǵalystyń Halyqaralyq federasııasy) standarttaryn qabyldap, basymdy baǵyttar boıynsha tehnıkalyq komıtetterdi qurý qajet. Budan bólek, halyqaralyq jáne aımaqtyq standarttardy teńestirgen jón. Sondaı-aq «halal» brendimen shyǵarylǵan taýarlardy baqylaıtyn kásibı mamandardy daıarlaý - asa mańyzdy is. Degenmen, osy ýaqytqa deıin komıtet mamandary birqatar sharalardy atqaryp úlgerdi.
«Biz arnaıy kelisimshartqa qol qoıdyq. Onyń negizgi maqsaty - halyqaralyq tájirıbeniń negizinde Qazaqstanda halal-ındýstrııasyn qurý. Osylaısha, aǵymdaǵy jyly qańtardyń sońynda elimizge malaızııalyq sarapshylar keledi. Olardyń qatysýymen Qazaqstandaǵy «halal» ulttyq júıesiniń negizgi tetikterin ázirleý kózdelip otyr. Osy jumysqa quziretti memlekettik organdar da atsalysady», - dep atap kórsetti komıtet basshysy.