2018 jyldan bastap Qazaqstanda jergilikti ózin-ózi basqarýǵa derbes bıýdjet engizý josparlanýda. Bul týraly búgin Parlament Májilisiniń jalpy otyrysynda QR ulttyq ekonomıka mınıstri Tımýr Súleımenov málimdedi.
«Halyqaralyq tájirıbe kórsetkendeı, jergilikti ózin-ózi basqarý júıesin damytý - ekonomıkalyq órkendeýdiń, áleýmettik ál-aýqat pen azamattyq qoǵamdy qalyptastyrýdyń birden-bir sharty bolyp tabylady. Qazaqstanda Jergilikti ózin-ózi basqarýdy damytý tujyrymdamasy qabyldanǵan. Onyń negizine Jergilikti ózin-ózi basqarýdyń eýropalyq hartııasynda bekitilgen mýnısıpıaldyq demokratııa men mýnısıpıaldyq basqarýdyń jalpyǵa birdeı tanylǵan qundylyqtary salynǵan», - dedi vedomstvo basshysy.
Osy tujyrymdamada Qazaqstan Respýblıkasyndaǵy jergilikti ózin-ózi basqarýdy damytý eki kezeńge bólingen:
Birinshi kezeń (2013-2014 jyldar) - basqarýdyń tómengi deńgeılerindegi qoldanystaǵy júıeniń áleýetin keńeıtý;
Ekinshi kezeń (2015-2020 jyldar) - jergilikti ózin-ózi basqarýdy odan ári damytý.
«Sizderge usynylyp otyrǵan Jergilikti ózin-ózi basqarýdy damytý máseleleri jóninde zań jobasynda (budan ári-zań jobasy) jergilikti ózin-ózi basqarýdyń derbes bıýdjeti men kommýnaldyq menshigin engizý, jergilikti ózin-ózi basqarý organdarynyń bıýdjet prosesi men kommýnaldyq menshikti basqarýdaǵy ókilettikterin keńeıtý kózdelgen. Zań jobasymen Bıýdjet, Salyq jáne Azamattyq kodeksterge, «Memlekettik múlik týraly», «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly», «Jarnama týraly» Qazaqstan Respýblıkasynyń Zańdaryna ózgerister men tolyqtyrýlar engiziledi», - dedi mınıstr.