QR Premer-Mınıstriniń birinshi orynbasary Asqar Mamın BAÁ Vıse-premeri men BAÁ Prezıdenti isteri jónindegi mınıstri sheıh Mansýr ben Zaıd Al Nahaıanmen kelissózder júrgizdi, dep habarlady primeminister.kz. Kelissózder barysynda QR Prezıdenti Nursultan Nazarbaevtyń BAÁ-ge 15-16 qańtardaǵy resmı sapary barysynda qol jetkizilgen, joǵarǵy deńgeıdegi ýaǵdalastyqtaryn is júzine asyrý joldary qarastyryldy.
Taraptar energetıka, munaıhımııa, atom ónerkásibi, kólik jáne logıstıka, áskerı-tehnıkalyq salalardaǵy ortaq jobalardy damytýǵa daıyn ekenderin rastady. «Báıterek» holdıngi men «Mubadala Development Company PJSC» Qazaqstan aýmaǵy men ózge kórshi elderdiń basym naryqtaryndaǵy ınfraqurylymdyq jáne ózge de jobalardy birlesip qarjylandyrý úshin jaqyn arada ózara ınvestısııalyq platforma qurýǵa kelisti. QR men BAÁ-niń energetıka mınıstrlikteri QR-da munaıgazhımııa kesheni qurylysynyń jobasyna taraptardyń qatysý múmkindigin talqylady. «Qazaqstan temir joly» ulttyq kompanııasy men «Etihad Rail» ulttyq temirjol kompanııasy BAÁ men úshinshi elderde birlesken ınfraqurylymdyq jobalardy júzege asyrý máselelerin talqylady. BAÁ atom energııasy jónindegi korporasııasy «Qazatomónerkásip» UAK»-men ıadrolyq energııany beıbit túrde paıdalaný salasynda ekijaqty qarym-qatynasty damytýǵa nıet bildirdi. Ámirlik taraby Qazaqstan Respýblıkasy Qarýly Kúshteri áskerı oqý-jattyǵý ortalyqtarynyń ınfraqurylym nysandaryn ınvestısııalaý máselesin qarastyrýǵa múddelilik tanytty.
•
18 Qańtar, 2017
Qazaqstan men BAÁ birlesken ınvestısııalyq platforma qurady
394 ret
kórsetildi