Búgin Senatta Qazaqstan Respýblıkasynyń 2016 jylǵa deıingi aqparattyq qaýipsizdik tujyrymdamasyn iske asyrý qorytyndylary talqylandy. Sharaǵa senatorlar men múddeli memlekettik organdardyń ókilderi qatysty. Kezdesýdi ashqan Senattyń Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva aqparattyq qaýipsizdik, jalpy ulttyq qaýipsizdikti qamtamasyz etý júıesin damytýdaǵy uzaq merzimdi jáne basym baǵyttarynyń biri bolyp tabylatynyn atap ótti.
Aqparat jáne kommýnıkasııa mınıstriniń orynbasary Alan Ájibaev Tujyrymdamany iske asyrýdyń negizgi qorytyndylary týraly depýtattardy habardar etti. Atap aıtqanda ol tehnologııa men telekommýnıkasııany damytýdyń ahýalyna, aqparattyq júıelerdiń qaýipsizdigin qamtamasyz etýge, buqaralyq aqparat quraldarynda otandyq ónimdi arttyrýǵa, sondaı-aq normatıvtik-quqyqtyq negizderdi jetildirýge toqtaldy.
Qorǵanys jáne aeroǵarysh ónerkásibi mınıstriniń orynbasary Dmıtrıı Golobýrda aqparat salasyndaǵy mańyzdy qaýipterge qarsy mekemeniń is-qımyly jónindegi aldaǵy josparlary týraly áńgimeledi.
Talqylaýǵa senatorlar M. Altynbaev, N. Ábiqaev, I. Adyrbekov, S. Jaqsybekov, G. Kım qatysty. Pikirtalas barysynda aldaǵy kezeńde osy salany retteýge arnalǵan strategııalyq qujattardy ázirleý máseleleri kóterildi. Depýtattar aqparattyq qaýipsizdik salasyn tehnologııalyq turǵyda jáne mamandarmen qamtamasyz etý, sondaı-aq osy máseledegi mekeme aralyq ózara is-qımyldyń keıbir máselelerine nazar aýdardy. Kezdesý sońynda komıtet tóraǵasy D.Nazarbaeva talqylaý nátıjesi boıynsha ázirlengen usynystar úkimetke jiberilip, sondaı-aq zań shyǵarý jumystarynda eskeriletinin atap ótti.