«Feısbýk HHI ǵasyrdyń revolıýsııalyq jańalyǵy der edim. О́ıtkeni buǵan deıin adamzat tarıhynda mıllıondaǵan adamdy eshkim bir jerge jınaı alǵan joq»-dep pýblısıst, belgili qalamger Sharhan Qazyǵul ótken jyly «Feısbýk» áleýmettik jelisinde jazǵan bolatyn. Áleýmettik jelide belsendi qalamgerdiń osy tektes erekshe oılary oqyrmandary tarapynan iltıpatqa bólenip, kommentpen quptalyp jatatynyna da kýámiz. Erekshe oılar men bólekshe pikirlerdiń nátıjesi aqyry «Ońashadaǵy onlaın oılar» bop jaryqqa shyqty. Kitaptyń tusaýkeseri belgili satırık Kópen Ámirbektiń júrgizýimen elordadaǵy Ulttyq akademııalyq kitaphanada ótip, astanalyq zııaly qaýym ókilderi qatynasty.
Kitap týraly aldymen pikir bildirgen belgili qalamger, Parlament Májilisiniń depýtaty Saýytbek Abdrahmanov pýblısıst Sharhan Qazyǵulǵa tán qasıet retinde syǵymdap, aıshyqtap aıtýdy ári tosynnan aıtýdy atady. Memlekettik syılyqtyń ıegeri, jazýshy Tólen Ábdik jýrnalıstıkany jaýynger janr dep baǵalap, shyndyq úshin shyrqyrap júrip jyl saıyn qanshama jýrnalıstiń kisi qolynan qaza tabatynyn mysalǵa keltirdi. О́ıtkeni jýrnalıstiń mıssııasy – qoǵamdyq oıǵa qozǵaý salý. Bul turǵydan alǵanda jazýshy «Ońashadaǵy onlaın oılardyń» áleýmetke qajettiligine, qoǵamdyq oıǵa qozǵaý salatyn qýattylyǵyna basa nazar aýdardy. «О́ziniń ishki álemin ashyp tastaý – erlik. Ol kez kelgenniń qolynan kele bermeıdi. Kitaptyń ishinde óte qundy oılar bar. Ony ary qaraı damytý kerek», – dedi T.Ábdik.
«Ońashadaǵy onlaın oılardyń» tusaýkeserinde Ákim Tarazı, Ǵadilbek Shalahmetov, Joltaı Álmashuly, Dıhan Qamzabekuly, Qaınar Oljaı syndy zııaly qaýym ókilderi óz pikirlerin ortaǵa saldy. Biri bilim-ǵylymǵa qatysty tustaryn, biri ádebı oılary men ádebı oralymdaryn, biri pálsapaǵa bastaıtyn tustaryn pikirlerine ózek etip, jalpy alǵanda pýblısıst, qalamger Sharhan Qazyǵuldyń jazý máneri men oılaý júıesiniń ereksheligine mán berdi. Osy jerde jazýshy Joltaı Álmashulynyń «Oqyrmandardy synaıtyn kitap bolady. Oqyrmandardy oılandyratyn kitap bolady. Sharhannyń kitabyn oqyrmandardy synaıtyn ári oılandyratyn kitap dep qarastyrý kerek» degeni kópshilik kóńilinen shyqqandaı. Shynynda biz kóbine kitap týraly, jazýshy týraly molynan aıtamyz da, oqyrmandardy umytyp ketip jatatynymyz bar.
«Ońashadaǵy onlaın oılar» janry anyqtalmaǵan, avtor óz atynan, ıaǵnı birinshi jaqtan jazylǵan emin-erkin oı-pikirlerdiń jıyntyǵy. Munda shynaıy ómirdiń barlyq qyzyǵy men shyjyǵy, jahandyq problemalardan bastap qazaqtyń qazirgi tynys-tirshiligine deıingi aralyqtaǵy kóptegen máseleler, qundylyqtar, tanym-nanymdar qalamgerdiń júrek súzgisinen ótip, kórkem tilmen kestelengen.
Aıgúl SEIILOVA, «Egemen Qazaqstan»