Bul kúnderi Atletter aýylynda Olımpıadalyq qalashyqtardyń dástúrlerine saı ıgi jańalyqtar oryn alýda. Sportshylar aýylynyń óz ákimi taǵaıyndaldy. Ol – qazaqstandyq boksshy, Olımpıada chempıony Serik Sápıev. Endi Sápıev óz mindetine sáıkes, sheteldik delegattardy qarsy alyp, saltanatty sharalarǵa qatysyp, aıtýly oqıǵalardyń basy-qasynda bolýy tıis.
Atletter aýylynyń taǵy bir jańalyǵy – bul qalashyq Ýnıversıadaǵa qatysýshy elderdiń esebinen 1 mıllıon eýro tabys tappaq. Bul týraly osy aptada qala ákimi Baýyrjan Baıbek Úkimettiń selektorlyq otyrysynda resmı túrde málimdedi. Demek, megapolıs qysqy sporttyq oıyndardy ótkizýdiń tıimdi jaqtaryn da kóre bastaıdy degen sóz.
– Búginge deıin Ýnıversıadaǵa qatysatyn 60 memleketten 57 el tirkelip úlgerdi. Bul qysqy Ýnıversıada úshin rekordtyq kórsetkish. Akkredıtasııadan ótken 45 elmen arada vızasyz rejim bar. Qalǵan 12 memleketpen vıza rásimdeý ońaılatylǵan. Al Ýnıversıadaǵa qatysýshy elderdiń delegasııalary Atletter aýylynda turǵany úshin 1 mıllıon eýro qarajat tóleıdi, – dedi Almaty qalasynyń ákimi.
Ýnıversıadanyń alǵashqy delegasııasy Almatyǵa 23 qańtardan kele bastaıdy. Bul – Qazaqstannyń óz komandalary men Kanada sportshylary. Al halyqaralyq áýejaı qazir qonaqtardy tıisinshe qarsy alýǵa tynymsyz jumys isteýde.
Delegasııalardyń eń kóbi 26 qańtarda ushyp keledi. Bul kúni 24 memleketten jetetin 700-den astam sportshy Atletter aýylyn toltyrady. Atletter aýylynda turaqtaıtyn eń úlken delegasııa Reseı (350 adam) men Qytaıdan (220 adam) keledi. Japonııadan – 158 atlet, Koreıadan – 158, Chehııadan – 128, Kanadadan – 122, AQSh-tan 114 sportshy dúbirli dodaǵa joldama alǵan.
Bul delegasııalardyń quramynda Olımpıada chempıondary, álem chempıonattary men qysqy Ýnıversıadalardyń júldegerleri jetkilikti. Eger sheteldik sport sańlaqtarynyń «shashbaýyn» salalyq mınıstrler, memlekettik laýazym ıeleri, eýropalyq qalalardyń merleri, AQSh-tyń Memlekettik hatshysy kómekshisiniń orynbasary kóterip keletinin eskersek, delegasııa salmaǵy aıqyn ańǵarylady.
Kelesi Ýnıversıada Krasnoıarsk qalasynda ótetindikten, Reseıden keletin qonaqtardyń sany da az bolmaıdy.
Aınash ESALI,
«Egemen Qazaqstan»
ALMATY