«Qazaq artegi» kóbeıe tússe

Urpaq tárbıesinde ustazdyń orny bólek qoı. Keıde ata-ana bere almaǵan tálim men tárbıeni muǵalim úıretip jatady. Jaqsy muǵalimge qarap boı túzeýdi ár bala ózine paryz sanaıdy. Men muny óz balalarymnyń ósý joly­nan kórip-bilip júr­min. Biz­diń bala kezimizde oqý­shy­lar lagerge jıi baryp tura­tyn. Qazaq balalarymen bir­ge ós­tik. Sodan da bolar, memle­ket­­tik tildi ózim de, balalarym da jaqsy biledi. Talǵar qala­syn­­daǵy Jambyl atyndaǵy №6 mek­­tep­tiń 10-synybynda oqıtyn qyzym Angelına Gaıvoronskaıa Kók­shetaýdyń Býrabaıyndaǵy «Bal­dáýren» oqý-saýyqtyrý keshe­ninde jıyrma kún bolyp qaıtty. Jaqsy dostar tapqanyn, bilimdi ustazdardan sabaq alǵanyn, meıirimdi tárbıeshilerden úlgi úırengenin úzbeı aıtyp júr. Ár pán muǵalimi oqýshyǵa qajet­tiń bárin jasapty. Taqy­ryp­tar boıynsha ótken sabaq­tar­dyń tizbesin, alǵan baǵasyn, minezdemesin qolyna ustatypty. Men sonyń bárine qarap otyryp elimizdegi birden-bir keshenniń osyndaı jumysyna rıza bolýmen qatar, alǵysymdy aıtyp hat jiberdim. Býrabaıdyń ásem tabıǵatynyń aıasynda ótken sabaq, úırengen tárbıe balamnyń máńgi esinde qalatyn sekildi. Men buryn Kókshetaýda «qazaq artegi» jumys isteıdi degen­di estıtinmin. Sóıtsem, ol «Bal­dáýren» oqý-saýyqtyrý kesheni ­eken. Bizdiń bala kezimizde Qyrymdaǵy Artekke barý ár oqýshynyń armany sanala­tyn. Endi mine, táýelsiz elimiz­de de sondaı «artek» jumys is­tep jatyr eken. Osy arada, aı­tar bir usynys-pikirim – «Bal­dáýren» oqý-saýyqtyrý kesheni­niń bólimshelerin barlyq óńir­lerden ashyp, sonyń bárinde de oqýshylar demala júrip bilimin jalǵastyratyn mektepter uıymdastyrsa, nur ústine nur bolar edi. Tipti, sol bólimshelerde jaqsy jaǵynan kózge túsken oqýshylardy «Baldáýrenge» jiberip jatsa, oqýshylardyń mártebesi kóteriler edi. Ony «qazaq artegi» dep atasy da esh artyqtyǵy joq sekildi. Bulaı deýime sebep, elimizdegi barlyq oqý­shylardy «Baldáýrenge» jiberý múmkin emes ekeni belgili. Onyń ústine, Býrabaıǵa baryp qaıtýǵa kez kelgen oqýshynyń jaǵdaıy da kótere bermeıdi. Bir sózben aıtqanda, mekteptegi ustazdar sekildi balalar demalyp, oqıtyn keshendegi muǵalimder men tárbıeshilerge de iltıpat bildirý kerek. Onyń ústine men «Egemen Qazaqstan» gazetin úzbeı oqıtyndardyń qataryndamyn. «Bilim», «Tálim» bólimderinde ustazdar týraly kóp jazylyp júr. Men de bas basylym arqyly us­taz­dar qaýymyna alǵysymdy bil­dirýdi mindet sanadym. Tatıana GLADKIH Almaty oblysy, Talǵar qalasy