Fýtboldan Qazaqstan jastar quramasy (18 jasqa deıin) Granatkın memorıaly týrnıriniń fınalyna shyqty. Bul týraly vesti.kz habarlady.
Jartylaı fınalda Grekııa quramasymen kezdesip, 2:1 esebimen jeńiske jetti. Qazaqstan quramasynan Aıdos Oral qos birdeı doptyń avtory atandy. Aldymen, 18-mınýtta penaltıden esep ashsa, 49-mınýtta ekinshi golyn saldy. Al grekterden shabýylshy Gıorgos Sovras 58-mınýtta mergendigimen tanyldy.
Bir aıta keterligi jerlesterimizden jartylaı qorǵaýshy Janáli Paırýz 42-mınýtta ekinshi sary qaǵazyn alyp, alańnan qýyldy.
Al aqtyq synda Reseı quramasymen synǵa túspek. Grekııa óz kezeginde úshinshi oryn úshin Sankt-Peterbýrgpen kezdesedi.
Qazaqstan quramasy buǵan deıin týrnırdiń fınalyna shyqpaǵan. 2012 jyly sońǵy, 2014 jyly 16-oryndy ıelense, 2015 jyly 14 ujymnyń ishinde 10-orynǵa turaqtaǵan.
Aıta keteıik, Granatkın týrnıri FIFA-nyń birinshi vıse-prezıdenti Valentın Granatkınniń qurmetine 1981 jyldan uıymdastyrylyp keledi. Oǵan barlyǵy 16 komanda qatysady.