Astyq kólemin arttyratyn basty sharttardyń biri – jańa, ónimdiligi joǵary suryptardy taýyp, olardy óndiriske jiberý ǵoı. Osy oraıda álemde búgingi tańda taqyr dándi arpany qoldanýdyń joǵary ekenin aıtqymyz keledi. Onyń tıimdiligi myna jaǵdaılardan kórinedi:
dáninen jasalǵan quramajem men unnyń ekonomıkalyq tıimdiligi óte joǵary; qurǵaqshylyqqa tózimdi jáne barlyq tabıǵı jaǵdaılarǵa shydamdy; Aýyl sharýashylyǵy mınıstrliginiń derekterine qaraǵanda, 2000-2015 jyldar aralyǵynda aýa raıynyń qolaılylyǵy jaǵdaıynda bul arpanyń ónimdiligi bıdaıǵa qaraǵanda gektarynan 1,5-2,5 sentner joǵary bolǵan. Sonymen qatar, júrek-qan tamyrlary aýrýlaryn, qant dıabeti men qaterli isik dertterin qaıtaratyn dıetalyq taǵamdarǵa qajetti bıologııalyq komponentter de munda jetkilikti.
О́kinishke qaraı, akademık Baraev atyndaǵy Astyq sharýashylyǵynyń ǵylymı-óndiristik ortalyǵynda ósirilip shyǵarylǵan arpanyń osy baǵaly surpy qazir Aqmola oblysynyń 6624 gektarǵa teń aýmaqtarynda ǵana ósiriledi. Sondyqtan biz – Májilistegi áriptesterim V.Bojko, R.Kım jáne Sh.Nurymov bárimiz astyq óndirý salasyn ártaraptandyrý sheńberinde taqyr dándi arpany et daıyndaýǵa qoldanylatyn quramajemdi jetildirý reseptýrasynyń qataryna engizý, sonymen qatar, ony astyqty oblystarǵa ósirýdi usyný qajet dep paıymdaımyz. Taqyr dándi arpanyń tuqymyn baptaıtyn kásiporyndy belgilep, oǵan qarjylyq qoldaý bildirý de asa kerek qoı dep oılaımyz.
Osy arpa dániniń júrek-qan tamyrlary, qaterli isik jáne qant dıabeti naýqastaryna qarsy emdik qasıeti bar ekenin eskere otyryp, ony osy aýrýdan zardap shegetinderdiń, sonyń ishinde, ásirese, balalardyń as mázirine qosý múmkindikterin zertteý jumysyn júrgizýdi Densaýlyq saqtaý jáne áleýmettik damý mınıstrligine tapsyrsa da utylmaıtynymyz anyq.
Sergeı ZVOLSKII,
Májilis depýtaty