Brıtanııalyq boksshy kishi Krıs Iýbenk (23-1, 18 KO) Independent basylymyna bergen suhbatynda Gennadıı Golovkınmen múmkin bolar jekpe-jegi jaıly aıtyp berdi. Bul týraly vesti.kz habarlady.
«Men Golovkınmen judyryqtasqym keletindigi jóninde bir jarym jyldan beri aıtyp kelemin. Ony R4R boıynsha álemniń úzdik boksshylarynyń biri deıdi. Al men bul pikirdiń jańsaq ekenin dáleldegim keledi. Jurtqa tek shyndyq kerek. Qarsylastaryn nokaýtpen jeńip júrgenine qarap, kópshilik ony myqty dep oılaıdy. Al men onyń jekpe-jekterin kórgennen keıin biraz kemshin tustaryn baıqadym. GGG-dan aılamdy asyra alatynyma senimdimin», – deıdi kishi Iýbenk.
Aıta keteıik, qos boksshynyń arasyndaǵy aıqas ótken jyldyń jeltoqsan aıynda ótýi tıis bolatyn. Alaıda kelissózder barysynda brıtanııalyq boksshynyń ákesi uıymdastyrý jumystaryn tolyǵymen óz ıeligine alǵysy kelgendikten, jospar aıaqsyz qaldy.