Sý tasqynynyń aldyn alý maqsatynda Qyzylorda oblysy boıynsha Syrdarııa ózeniniń arnasy qaýipti 56 ýchaskege bólinip, olar boıynsha 135 jaýapty mekeme bekitildi, dep habarlady QazAqparat. Atalǵan mekemeler 1 685 adam kúshimen jáne 403 birlik arnaıy tehnıkamen jaraqtalǵan. Bul týraly О́ńirlik kommýnıkasııalar qyzmetinde ótken brıfıngte oblystyq jumyldyrý daıyndyǵy basqarmasy basshysynyń mindetin atqarýshy Ǵabıt Jańabaev málimdedi. «Sý tasqynyna qarsy jumystarǵa paıdalanylatyn materıaldyq-tehnıkalyq qorlar boıynsha barlyǵy 109,8 tonna janar-jaǵarmaı qory jáne 199 500 dana qap, onyń ishinde oblys rezervinde 153 000 dana, qala jáne aýdandar sheginde 46 500 dana qap saqtaýda tur. Sonymen qatar, 17 350 baý qamys, 14 720 dana pashyn jáne 500 tekshe metr qarabýra men taǵy da basqa qajetti materıaldardyń qorlary jasaqtaldy», – dedi sala basshysy. Búgingi kúni Qyzylorda qalasy men aýdandarda tasqyn sý kezeńinde halyqty kóshirýge arnalǵan 82 evakýasııalyq jınaqtaý jáne 96 qabyldaý pýnktteri daıyndyqqa keltirilgen.