Úndistannyń Ýttar-Pradesh shtaty Bıdjnor qalasynyń turǵyny týǵan baýyrynyń jasaǵan qylmysy úshin 10 jyl túrmede otyryp shyqty, dep jazdy Times of India basylymy.
43 jastaǵy Bala Sıngh keshe, 21 qańtar kúni bostandyqqa shyqty. Belgili bolǵandaı, polısııa ony kisi óltirdi degen kúdik tańylǵan týǵan baýyry Pappý Sınghpen shatastyryp alǵan.
«Men jeke basymdy kýálandyratyn qujatym bolmaǵany úshin 10 jyl ómirimdi temir tordyń ar jaǵynda ótkizýge májbúr boldym», – dedi Bala Sıngh jýrnalısterge bergen suhbatynda. Onyń ádiletsizdikpen jaýapqa tartylýyna sebep bolǵan qylmys 2001 jyly jasalypty. Ol kezde polısııa 4 kúdiktini ustaǵan eken. Olardyń arasynda aǵaıyndy Sınghtar bolǵan. Alaıda, belgisiz sebeptermen Pappý jaýapkershilikten qutylyp ketken. Sot tez arada istiń jabylýyn talap etip, qysym kórsetkennen keıin polısııa 2006 jyly Balany Pappý dep tanyp, ony baýyrynyń ornyna jaýapqa tartqan.
«Bizde Pappý Sınghtyń budan burynǵy isinen qalǵan saýsaq izderi saqtalǵan. О́tken jyly ony Balanyń saýsaq izderimen qosyp sot-krımınalıstik saraptamaǵa jiberdik. Sonyń nátıjesinde polısııanyń kúdiktilerdi shatastyryp alǵany anyqtaldy», – dep málimdedi túzetý mekemesiniń ókili S.Mıshra.