«Nur Otan» partııasynyń «Kedergisiz keleshek» jobasy aıasynda Aqtóbe qalasyndaǵy bos jumys oryndar jármeńkesine tek múmkindigi shekteýli adamdar shaqyryldy. Bir kúnde barlyǵy 40 múgedek jumysqa ornalasty, dep habarlaıdy QazAqparat.
Jármeńkede 24 mekeme 67 jumys ornyn usynǵan. Aldyn-ala shaqyrtý alǵan múmkindigi shekteýli jandarǵa bilim, densaýlyq saqtaý mekemelerimen qatar, óndiris oryndarynan jumys berildi. Kommýnaldyq mekemeler de ózderine qajetti mamandy izdedi. Múgedekterge tiginshi, kúzetshi, abonentterdi baqylaý, kompıýter baǵdarlamashylary sekildi birneshe jaýapty jumys oryndary usynyldy.
«Jármeńkege 63 múgedek jan keldi. Olardyń 32-si turaqty jumysqa joldama alyp, segiz adam qoǵamdyq jumysqa tartyldy. Bilimin jetildirý, jańa mamandyq ıgerýge nıet bildirgen úsh adam qaıta daıarlaý kýrsyna jiberildi», – dedi «Nur Otan» partııasy Aqtóbe oblystyq fılıalynyń saıası bóliminiń meńgerýshisi Aqylbek Sahıev.
Múgedekter arasynda kásipker bolyp, shaǵyn bıznesti qolǵa alýǵa nıet bildirýshiler de bar. Olarǵa shaǵyn nesıe alýdyń joldary túsindirildi.