Ishki ister mınıstrligi kóliktegi ishki ister departamentiniń jedel keńesi ótti, dep habarlaıdy QazAqparat.
Keńes barysynda aıtylǵandaı, 2016 jyly departamenttiń qaraýyndaǵy ýchaskede 2642 quqyq buzýshylyq tirkelip, onyń 1796-sy qylmys jáne 846-sy teris qylyq sanattaryna jatqyzylǵan. Keshendi sharalardyń nátıjesinde qylmystar sany – 11,2 paıyzǵa, onyń ishinde aýyr qylmystar 6,5 paıyzǵa tómendegen. Sonymen qatar, buzaqylyq – 28,8 paıyzǵa, qarashylyq – 22,7 paıyzǵa, alaıaqtyq – 20 paıyzǵa, bótenniń múlkin urlaý 10,2 paıyzǵa azaıdy.
«Qylmyskerlerdi izdestirý boıynsha tıisti jumystar atqaryldy. О́tken jyly aýyr jáne asa aýyr qylmystardy jasaǵany úshin ishki ister organdarynan jasyrynyp júrgen 38 qylmysker ustaldy», delingen departamenttiń málimetinde.
Byltyr kóliktegi ishki ister departamentiniń jelilik bólimsheleri esirtki zattarynyń zańsyz aınalymyna baılanysty 453 faktini anyqtady. Kólik polıseıleri 1 tonnadan astam túrli esirtki zattardy tárkiledi. Onyń ishinde 3 keliden astamy geroın. О́tken jyly buzaqylyq pen mádenıetsizdikke qatysty teris qylyqtary úshin ákimshilik jaýapkershilikke 57 myń quqyq buzýshy tartyldy.