EKSPO-2017 halyqaralyq mamandandyrylǵan kórmesine daıyndyq aıasynda Bangkokte «Qazaqstan jáne «EKSPO-2017» taqyrybynda brıfıng ótkizildi, dep habarlaıdy QR Syrtqy ister mınıstrligi.
Sharaǵa Taıland memlekettik organdarynyń, ulttyq kompanııalarynyń basshylary jáne 40-tan astam jetekshi BAQ ókilderi qatysty.
Taılandtyń energetıka mınıstri Anantaporn Kandjanarat alǵashqy sózdi alyp, Taıland pavılonynyń tujyrymdamasymen tanystyrdy. Ol Taıland úkimetiniń 2017 jyldyń eń mańyzdy sharalarynyń birine daıyndyq barysy týraly áńgimeledi.
«Qazaqstan tańdaǵan «Bolashaqtyń energııasy» taqyryby barlyq adamzattyń bolashaq urpaq úshin ózekti máselelerin kórsetedi. Sondyqtan Taıland bıoenergetıkany jahandyq damytýǵa óz úlesin qosyp, Astanada jańartylatyn energııa kózderi salasyndaǵy óz ázirlemelerin kórsetýge nıetti», – dep atap ótti ol.
Qazaqstan Respýblıkasynyń elshisi Marat Esenbaev óz sózinde «EKSPO-2017» kórmesine daıyndyq barysymen tanystyryp, kórmeniń negizgi kezeńderi týraly baıandap, jýrnalıster men bıznes ókilderin is-sharaǵa belsendi qatysýǵa shaqyrdy.
Sondaı-aq elshi Taılandtyń Kommersııa mınıstrliginiń, Investısııalar palatasynyń ókilderimen kezdesý ótkizdi.