Áńgime aıtsa, meniń Ahmetjan dosym aıtsyn... Qyzyq áńgime aıtqanda kózderi kúlimdep, ıyǵyn qaıta-qaıta qomdap, bir ornynda baıyz taýyp tura almaı, óńiniń alaýlap ketetini bar.
Birde Ahańnyń jaqyn dosy qystyń kúni «Volgasymen» aıdalada yzǵytyp kele jatqan ǵoı. Qasynda taǵy bir jigit bar. Tún bop qalǵan kez. Aspan ashyq bolǵanymen, aıaz qysyp tursa kerek. Qar qalyń. Aýylǵa baratyn jol kúrelgen eken. Eki jigit mýzykany baqyrtyp qoıyp, jyp-jyly kabınada kósilip áńgime aıtyp kele jatady.
Aıtpaqshy, kóliktiń júk salǵyshyna bes-alty qapshyq jem artyp alǵan.
Kenet aıdalada bir qasqyr aldarynan kesip ótedi. Tejegishti basyp úlgermeı, qatty ekpinmen qasqyrdy týra jambastan soǵyp ushyryp jibergen ǵoı. Áreń degende toqtap, túsip baryp qarasa, baıǵus arlan qasqyr eken. Aýzynan qany aǵyp, ólip qalypty. Júk salǵyshqa salaıyn dese ishi bos emes, artqy oryndyqqa uzynnan tastaı salyp, ári qaraı yzǵyta jóneledi.
Aıdalada taǵy biraz júredi. Bir kezde mýzykaǵa eltip otyrǵan shopyrdyń kózi kabınadaǵy aınaǵa túsip ketse kerek... Sóıtse artqy oryndyqta bireý otyrǵan sııaqty. Jalt qarasa, álgi qasqyr... Artqy oryndyqta shoqıyp otyr.
«Oıbaı» dep, birden tormozdy basyp, ekeýi de dalaǵa atyp shyqqan ǵoı. Taǵy jolaýshy jigit esigin jappastan bezip bara jatyr eken, shopyr «Oıbaı, esikti jap, qasqyr shyǵyp ketpesin...» dep aıqaılap, esikti sart jabady.
Sonymen aıdala... Tún. Jaqyn arada ekeýinen basqa eshkim joq. Qar qalyń, aıaz qysyp tur. Mashınanyń esigin ashýǵa qorqady. Arlan qasqyrdyń ashýy qatty. Ekeýin de jaıratyp tastaýy múmkin.
Syrtqy kıimderin kabınaǵa sheship qoıǵan ekeý á degennen-aq jaýraı bastaıdy. Tipti bir orynda tura almaı sekire bastaǵan ba?...
Al, bul kezde qasqyr-ekeń jyp-jyly kabınada, mýzyka tyńda-a-ap otyr... Sazdy áýenge ol da eltip ketse kerek, kólik anda-sanda teńselip-teńselip qoıatyn kórinedi...
Sodan óldim degende alystan bir kóliktiń jaryǵy kórinedi ǵoı. Shóp artyp kele jatqan úlken mashına eken. Aldynan júgirip shyǵyp, jaǵdaıdy túsindiredi. Sonymen úlken kóliktiń tekpeshegine jabysqan bir jigit qolyna besaqa ustap, áreń degende áýpirimdep «Volganyń» artqy esigin ashyp jiberipti.
Beli esik pen tórdeı uzyn, dáý qasqyr eken. Artqy esikten sozylyp túsipti de, bularǵa bir qarap qoıyp, qalyń qarmen asyqpaı jorta jónelipti.
Sóıtse, júk kóligindegi jigitter «Myna qasqyr «Bir aýyldyń malyn jeýge bara jatyr edim... Jigitter, rahmet... biraz jerge jetkizip tastadyńdar» dep ketip bara jatqan sııaqty ǵoı...» dep, jaýrap qalǵan eki jigitti odan beter kúldirse kerek.
Oralhan DÁÝIT,
«Egemen Qazaqstan»