Qazaqstan Respýblıkasy y «Ońtústik» óńirlik qolbasshylyǵyna qarasty áskerı bólimderde jańa oqý jylynda qazaq tilin oqytýǵa basa kóńil bólinip otyr. Máselen, Almaty qalasynda ornalasqan 7552 áskerı bóliminde qazaq tilin oqytýǵa arnalǵan shara ótti. Onyń barysynda Almaty qalasynda memlekettik tildi ár túrli mekeme qyzmetkerlerine oqytý, nasıhattaý, qyzmet aıasyn keńeıtý maqsatynda júrgizilip jatqan jumystar tanystyryldy, jeke quramǵa qazaq tilinen panoramalyq sabaqtar ótkizildi, til mamandary arasynda is-tájirıbemen bólisý semınary uıymdastyryldy.
Atalǵan jıynǵa Ulttyq ulannyń Almaty garnızonynda ornalasqan áskerı bólimderiniń til mamandarymen qatar, Almaty qalasynyń Tilderdi damytý, muraǵattar jáne qujattama basqarmasynyń jaýapty qyzmetkeri Nurmuqa Shaımerdenov, «Ulaǵat» halyqaralyq ınnovasııalyq bilim berý ortalyǵy memlekettik tildi damytý bóliminiń bastyǵy Anar Myrjyqbaeva, ulttyq aýdıtorııada qazaq tilinen dáris beretin ustazdar arasynda ótken qalalyq baıqaýda «Úzdik qazaq tiliniń muǵalimi» atanǵan, oqytý orys tilinde júrgiziletin mekteptiń qazaq tili men ádebıeti pánderiniń muǵalimi Zamıra Qasymjanova qatysyp, óz is-tájirıbelerimen bólisti.
Qazaq tiliniń qoǵamdyq qarym-qatynastaǵy mańyzy kún sanap artyp keledi. Qazaqstan Respýblıkasynyń Konstıtýsııasy, «Tilder týraly» Qazaqstan Respýblıkasynyń Zańy talaptaryna saı qazaq tili memlekettik til retinde barlyq memlekettik mekemelerdiń, oqý-tárbıe oryndarynyń jumysynda birkelki qoldanylady. Áleýmettik zertteý nátıjeleri de sońǵy jyldary qazaq tiline degen suranystyń artyp kele jatqanyn ańǵartady. Soǵan qaramastan, qoǵamdyq qarym-qatynastaǵy, memlekettik mekemelerdegi qazaq tiliniń qoldanys aıasyn keńeıtý máselesi kún tártibinen túspek emes.
О́z qarym-qabiletin tanytyp, laýazymdy qyzmet atqarýdan úmitti kez kelgen jan óz maqsatyna jetý jolyndaǵy alǵashqy qadamyn qazaq tilin tolyq meńgerip alýdan bastaǵany abzal. Osy oraıda, Qazaqstan Respýblıkasynyń Ulttyq ulanynda memlekettik tildi oqytý, qyzmette qoldanylýyn damytý jumystary, túrli nasıhattyq sıpatta uıymdastyrylatyn is-sharalar qarqyn ala túskendigin atap kórsetý kerek.
Danara BAIMAǴANBETOVA,
Ulttyq ulannyń «Ońtústik» óńirlik qolbasshylyǵy tárbıe jáne áleýmettik jumystar
basqarmasynyń memlekettik tildi engizý jónindegi ofıseri
ALMATY