Keshe elordada Qazaqstannyń Syrtqy ister mınıstri Qaırat Ábdirahmanov BUU-nyń Sırııa jónindegi arnaýly elshisi Staffan de Mıstýramen kezdesip, taraptar Astanada ótetin Sırııa Arab Respýblıkasynyń úkimeti men sırııalyq qarýly oppozısııa arasyndaǵy ahýaldy retteý jónindegi halyqaralyq kezdesý jaıyn talqylady, dep habarlady Syrtqy ister mınıstrliginiń baspasóz qyzmeti.
Staffan de Mıstýra BUU Bas hatshysy Antonıý Gýterrıshtiń atynan Qazaqstan Prezıdenti Nursultan Nazarbaevqa sırııalyq kelissózder úshin alań uıymdastyrǵanyna rızashylyǵyn bildirip, BUU-nyń Astanadaǵy kezdesý ıdeıasyn birinshi bolyp qoldaǵandyǵyn atap ótti. Al Qaırat Ábdirahmanov óz kezeginde Qazaqstan BUU-ny Sırııa boıynsha kelissózderdi uıymdastyrý prosesiniń jetekshi qatysýshysy retinde qarastyratyndyǵyn jáne Astanada ótetin kezdesý Jeneva beıbit kelissózderiniń kezekti raýndyna daıyndyq barysyna oń úles qosatyndyǵyna toqtaldy. Sondaı-aq, olar kezdesýge daıyndyqtyń is júzindegi uıymdastyrýshylyq aspektilerin jan-jaqty talqylap, sırııalyq janjaldy retteý boıynsha belsendi kúsh-jigerdi jalǵastyrý qajettigine nazar aýdardy. Áńgimelesý barysynda Qazaqstannyń syrtqy saıasat vedomstvosynyń basshysy BUU-nyń arnaýly elshisine elimizdiń bitimgershilik bastamalary men BUU Qaýipsizdik Keńesine músheligi kezindegi qyzmetiniń basymdyqtaryn tanystyrdy.
Sonymen qatar, Syrtqy ister mınıstri Q.Ábdirahmanov osy kúni Iran Islam Respýblıkasy men Reseı Federasııasy jáne Túrkııa Respýblıkasy delegasııalarynyń basshylarymen de kezdesip, Astanadaǵy sırııalyq retteý jónindegi halyqaralyq kezdesýge daıyndyqtyń túrli aspektilerin talqyǵa saldy.