Qazaqstan Prezıdenti Nursultan Nazarbaev elordada bastalǵan Sırııa máselesin retteý jónindegi halyqaralyq kezdesýge (Astana prosesi) qatysýshylarǵa úndeý joldady. Úndeýdi kelissózder barysynda QR Syrtqy ister mınıstri Qaırat Ábdirahmanov oqyp berdi.
«Sırııa ahýalyn retteý jónindegi kelissózder qatysýshylaryna sálem joldaımyn. Sırııada oryn alǵan kúrdeli ahýal búkil álemdik qoǵamdastyqtyń nazaryn ózine aýdaryp otyr. Shamamen 6 jyl boıy jalǵasyp jatqan qantógis janjal túrli órkenıet pen mádenıet toǵysqan qasıetti ólkege qaıǵy-qasiretten basqa eshteńe ákelmegendigin moıyndaýǵa májbúrmiz. Qazaqstan beıbitsúıgish el jáne BUU Qaýipsizdik keńesiniń turaqty emes múshesi retinde Taıaý Shyǵys óńirindegi qaýipsizdik pen turaqtylyqtyń ornap, bekı túsýine múddelilik tanytady», - dep atap ótken QR Prezıdenti.
Memleket basshysy búgingi kezdesý Sırııadaǵy ahýaldy beıbit retteýge baǵyttalǵan halyqaralyq qoǵamdastyq kúsh-jigeriniń jarqyn úlgisi sanalatyndyǵyn basa aıtyp ótti.
«Qazaqstan Sırııa ahýalyn sheshýdiń jalǵyz durys joly ózara senim men ózara túsinistikke negizdelgen kelissózder bolýy tıis dep sanaıdy. Elimizdiń búgingi kelissózderdi ótkizý orny retinde tańdap alynýy da tosynnan emes. О́zderińizge belgili, 2015 jyly Astanada jekelegen sırııalyq oppozııalyq toptar arasyndaǵy kelissózderdiń 2 raýndy ótti. Biz sırııalyq bosqyndardyń beınetin jeńildetý úshin 700 myń dollardan astam qarjy bóldik, taıaýda azyq-túlik túrindegi 500 tonna gýmanıtarlyq júk jónelttik. Astanadaǵy kezdesý barlyq múddeli taraptardyń BUU qamqorlyǵyndaǵy jenevalyq prosess aıasynda sırııalyq daǵdarysty ońtaıly sheshýdi qamtamasyz etetindigine jáne Sırııadaǵy beıbitshilik pen turaqtylyqty ornatý isine laıyqty úles qosatyndyǵyna senim bildiremin. Nátıjeli jáne tabysty kelissózder tileımin», - dedi Nazarbaev.