Qazaqstanda jeke sot sarapshylarynyń palatasy qurylady. Bul týraly búgin QR Parlamenti Senatynyń Konstıtýsııalyq zańnama, sot júıesi jáne quqyq qorǵaý organdary jónindegi komıtettiń keńeıtilgen otyrysynda «Sot-saraptama qyzmeti týraly» zań jobasyn qaraý barysynda QR Ádilet mınıstrligi sot saraptamasy ortalyǵynyń dırektory Isıdor Borchashvılı aıtty.
«Biz bul zań jobasynda jeke sot sarapshylary qyzmetiniń damýyna úlken kóńil bóldik. Jeke sot sarapshylarynyń palatasynyń qurylýyn eskerdik. Bul básekelestik turǵyda oń áserin beredi, erteń múddeli tarap nemese belgili bir organ saraptamany Sot saraptamasy ortalyǵynda ǵana emes, jeke lısenzııasy bar táýelsiz sarapshyǵa júginý quqyǵyna ıe bolǵany durys», - dep atap ótti ol.
Sot saraptamasy ortalyǵynyń basshysy, zań jobasynda jeke sot sarapshylarynyń quzyreti men mindetteri naqty belgilengendigin aıtýda. Bul óz kezeginde qyzmet kórsetý sapasyn jaqsartý úshin jasalyp otyr.
«Búginde saraptama júrgizýge 402 adam lısenzııa alǵan. Al shyn máninde sot saraptamasyn 132 jeke sarapshy jasaı keledi. Menińshe, jańa normalar bizdiń otandyq sarapshylyq qyzmetti odan da bıik deńgeıge kóteredi», - dedi Isıdor Borchashvılı.
Onyń aıtýynsha, Qazaqstanda, sonymen qatar, 714 sarapshy-medık bar. «Bular sot-medısınalyq sarapshylar, narkologtar men psıxıatrlar. Sot saraptamasy ortalyǵynda 609 qyzmetker bar, al sarapshylyq qyzmetti 570 adam atqarady», - dep túıdi oıyn Isıdor Borchashvılı.