Semeı qalasynda Ertistiń jaǵasynda, qaraǵaıly ormannyń arasynda Qaraǵaıly atalatyn jańa yqshamaýdan salynyp jatyr. Bul jer alashtyń rýhanı astanasy sanalatyn Semeıdiń eń kórikti aýdany ǵana emes, qaladaǵy birqatar áleýmettik máselelerdi sheshýge baǵyttalǵan, semeılikterdiń seıil quratyn, shynyǵatyn, tynyǵatyn, bilim alatyn tamasha orynǵa aınalady dep kútilýde.
Qaraǵaıly yqshamaýdanynda 64 toǵyz qabatty, 7 on eki qabatty jáne 10 jetti qabatty turǵyn úı boı kóteredi dep josparlanǵan. Buǵan birneshe áleýmettik jáne mádenı-sporttyq nysandardy qosyńyz. Olardyń qatarynda álemdik standarttarǵa saı keletin, 5 myń adamǵa shaqtalǵan «Abaı-arena» sport kesheni, qazaq-túrik lıseıi, medısına ýnıversıtetiniń 7 jataqhanasy men múgedekterge arnalǵan ońaltý ortalyǵyn aıtýǵa bolady. Keleshekte bul yqshamaýdandaǵy turǵyndar sany 18,1 myń adamdy quraıdy dep mejelenip otyr.
Shyǵys Qazaqstan oblysynyń ákimi Danıal Ahmetov Semeıge jasaǵan jumys sapary aıasynda jańa yqshamaýdannyń bas josparymen tanysty.
-Birkelkilikten boıdy aýlaq salý kerek. Keıbir úılerdi kirpishten, keıbir úılerdi shynydan turǵyzǵan lázim. Eń bastysy, jurttyń kóńilinen shyǵatyndaı bolýy qajet. Bul Semeıdiń tarıhynda buryn-sońdy bolmaǵan erekshe úlgidegi, jańa turpattaǵy yqshamaýdan bolady dep oılaımyn, - dedi Danıal Ahmetov.
Bir aıta keterligi, bıyl Semeı qalasyn abattandyrýǵa aıryqsha nazar aýdarylmaq. Shahardy abattandyrý jumystaryna qala bıýdjetinen 360 mıllıon teńgeden astam qarjy bólinedi. Bul qarajatqa Ertis jaǵalaýynan bólek Qabanbaı batyr alańy men Muhtar Áýezov eskertkishi óńdelip, jóndeletin bolady. Qala kóshelerindegi joldardy jóndeýge qosymsha 1,1 mlrd teńge bólinedi. Oblys ákimi Danıal Ahmetov Semeıdiń jylý júıesindegi olqylyqtardy retteý úshin bıyl 3,4 mlrd. teńge qarajat qarastyrylatynyn jáne osy arqyly jylý máselesin birjola sheshýdi josparlap otyrǵanyn jetkizdi.
Azamat Qasym, "Egemen Qazaqstan".
Shyǵys Qazaqstan oblysy.